Atualità

USP – Na ressoluzion per defënder l lëur da paur tla montes ie ncuei (10 lugio) unida sotscrita dal assessëur Hans Berger y si coleghes di raions da mont y data inant al cumisser dl’Europa per l’agricultura Mariann Fischer Boel. Ucajion per la ressoluzion à dat la cunferënza nternaziunela per l lëur da mont a Garmsich. “Al’Europa damandons segurazions per l tëmp che vën do l 2013 n cont de politica dl lëur da paur tla montes, cun modiei de finanziamënt a pert che garantësc servijes ala comuniteies che viv y lëura tla montes” à dit Berger te si rujeneda a Garmisch.

USP – Aldò dl Istitut provinziel de statistica ASTAT se à 46,7% dla families dl Südtirol bele anjenià n decoder per la televijion digitela. La majera pert de chëi che à chësc aparat vif ora de zità (52,2%). Te zità iel permò 40,6 % di cuatieres che à n tel decoder. Cun 64,3% dla families iel belau doi terzi che à n’antëna per l satelit, scebën che per udëi la televijion digitela sun tiera ne ie chësta nia debujën.

USP – 29 chemuns dla Provinzia de Bulsan pieta nce ntan chësc instà la butëighes daviertes da sëira. Te Gherdëina vëniel ai 20 de lugio metù man cun l “shopping” da sëira. Cun la butëighes daviertes ntan doi sëires al’ena devënta i zëntri di luesc ponc de ancunteda per i zitadins. L Dipartimënt provinziel per l’economia sustën chësta scumenciadiva.

USP – Co che la va inant cun trëi majeri lëures n cont de ruves da mont à l presidënt dla Provinzia Luis Durnwalder ncuei (9 lugio) nstës ulù cialé do deberieda cun i tecnics dla Repartizion per ruves da mont. N cont di lëures a Al Plan y San Laurënz à Durnwalder spiegà che i lëures vën fai per defënder raions de produzion y purtoies dai schi.

USP – Tla scoles autes ladines ie 59 sculeies passei l ejam de maduranza. Cater mutans à finà via la scola auta cun la miëura nota de 100 ponc sun 100. Cun chisc resultac ne iel chëst ann no me stat de plu sculeies che à fat la matura ma nce de plu che à arjont duc i ponc.

USP – N juebia che vën, 16 de lugio vëniel ufizialmënter giaurì la streda de zircunvalazion nueva a S.Crestina. Per l tai dla vëta unirà adalerch l presidënt dla Provinzia Luis Durnwalder y l assessëur ai lëures publics Florian Mussner.

USP – Aldò dla nrescida dl Istitut provinziel dl statistica ASTAT ie passa 90% di zitadins dla Provinzia de Bulsan cuntënc cun l’aministrazion provinziela y l’aministrazion de chemun. Cun l’aministrazion naziunela ie me 65% cuntënc. I Servijes saniteres vën n generel udui de bona cualità, ma l messëi aspité giut ti desturba ai zitadins. Nia cuntënc ne iesen cun la posta, la ferata statela y i servijes dl telefonn: belau uni segondo à dit de vester melcuntënt cun chisc servijes.

USP – La Provinzia de Bulsan uel mëter su n zënter de nrescida per medejina de prim aiut tla montes. Chësc ie unì fat ora ncuei (6 lugio) dala Jonta provinziela. L presidënt Durnwalder à do la senteda prejentà i ponc de majer nteres: l giaurì de uties dl CAI, n daz sun l jëuf Stelvio, la cherta Museum mobil, la plaza dai auti pra l spedel de Bulsan y n zënter de nfurmazion sun l tunel dl Prëner a Furtëza.

USP – Nchin ala fin dl mëns possa urganisazions se scrì ite tla lista per giapé ulenteres dl servisc zevil. A livel naziunel vën alincontra nchin ai 27 de lugio publicà l cuncors per ulenteres.

USP – Nchin ala fin dl mëns na pruposta sun argumënc y tëmps, nchin te mez ann prupostes cuncretes: chësc à cunedì l minister per cuestions nternes Roberto Maroni n vënderdi sëira (3 lugio) a Bulsan do la mëisa de descuscion sun la cunvivënza. “Duc chëi che à rujenà pea à nce dit l’aurità, spere medrë che la ulentà de rujené cun scerietà vënie nce cuncretiseda. La va de lauré per soluzions y no per se tré ora velch a fin politich” à detlarà l Presidënt dla Provinzia Luis Durnwalder.