Atualità

USP – Tl ann 2010 toma la cunzescions dla Lia da Mont taliana CAI per la uties da mont dla Provinzia. “Nchin a ntlëuta nes muessa vester tler co che dëssa cialé ora l daunì dla uties” dij l assessëur al turism Hans Berger. Te n’ancunteda cun i respunsabli dl CAI se à Berger damandà che CAI y AVS tudësch, porte riesc n cunzet laurà ora deberieda.

USP – L bilanz dla regions autonomes puderà nce tl daunì unì menà zënza se tenì ai criteries de cunvergënza. La regions messerà judé a sparanië aldò di fins metui dant dal Stat. Chësc ie uni ora dala tratatives n cont dl federalism fischel di presidënc dla regions autonomes ncuei (16 merz) cun l minister Roberto Calderoli y Raffaele Fitto a Roma.

USP – L assessëur Florian Mussner lauda i trëi chemuns de Gherdëina che à n sada giapà na uneranza da pert dla lia VKE per la plazes da fé damat. “Canche l vën dat valor ai mëndri iel n sëni de sensibilità soziela y cualità de vita” sorissea Mussner.

USP – N vënderdi y sada, 20 y 21 de merz possa la listes che se prejënta ala veles de chemun a Badia, Prëner, Mals y Plaus de ju i sënies de lista. L dé ju l sëni tla Presidënzia provinziela cumporta la defendura giuridica dl sëni, ma ne ie nia de ublianza.

USP – La Jonta provinziela de Bulsan à ncuei dat pro la pruposta de lege finanziera. I assessëures provinziei, zënza presidënt che ie ncuei a Roma, à danterauter nce tratà la majons per mëndri ti hotiei, nvestizions per la miniera de Prettau y la puscibltà de pratica per sculeies.

Chëst’ ena tën l aucat populer de plu udienzes te de pu luesc. A S. Martin de Tor sarala n vënderdi 20 de merz.

USP – Chi che ulëssa tl ann che vën jì a nsenië tla scola prufesciunela o te na scola de mujiga, possa nchin ala fin dl mëns se lascé mëter sun la graduatories. Chësc reverda nce la grupa de rujeneda ladina. L formular aldò ie publicà sun la plates provinzieles tl internet.

USP – La rejons, i fins, presuposc’ y dates n cont dl sustëni nuef da pert dl Fond soziel europeich (ESF) iel unì prejentà n vënderdi (13 de merz) a Bulsan. “La particularità de chësta bandida ie che a chësta maniera vëniel tëut pruvedimënc che ti va a bën dla persones tuchedes dala crisa economica” dij l assessëura Barbara Repetto.

USP – La normatives n cont dla segurëza per culaburadëures ulenteres tla lies ie unides spëntes. Chësc vën fat al savëi dala repartizion provinziela per l lëur. L terminn nuef per l jì n drova dla normatives ie de mei 2010.

USP – Aldò de na comunicazion dl Istitut provinziel de statistica Astat ie l Index per i priejes de cunsum per families (FOI) tl chemun de Bulsan sëura la media statela. Chësc reverda duc i mënsc dl ann 2008 cun na variazion da 0,7% (lugio y agost) a 0,3% (nuvëmber y dezëmber). A livel naziunel ie la nflazion media stata de 3,2%, a livel provinziel de 3,8%.