Atualità

USP - Cun la giaurida dl zënter soziel nuef a Pidrò à la populazion dla Val Badia n servisc ntier n cont dla strutures residenzieles sozieles. N sada ai 17 de mei iel unì tenì la giaurida ufiziela cun truepa autoriteies, danter chëstes nce l presidënt dla provinzia Durnwalder, l assessëur Mussner y l ambolt Complojer.

USP – Tla gran batalia per i scioldi sun l marcià di nvestimënc tl Südtirol ie la banches, la assegurazions y i aministradëures de fonds drët creatives. Per chëi che ne ulëssa nia ji sot tla gran vela y mantenì na sëuravijion pieta la Provinzia de Bulsan y la Zentrela de Consumadëures n manual dal titul "Verantwortlich anlegen"- "Saper investire".

USP - La jonta provinziela à ncuei lunesc, 19 de mei, dat pro n cuntribut de 250.000 Euro ai chemuns ladins per adurvé la rujeneda ladina. Tla senteda iel danterauter nce unì rujenà de tan inant che la provinzia ie cun l smëndrì dla burocrazia, la stredes dala rodes, l sustëni a scoles privates y la situazion di dependënc dla posta y dla ferata.

USP – I tuniei sun la streda statela a Mühlbach resta sarei dal 20 nchin a 23 de mei. L muvimënt di auti vën ntant menà sun la vedla streda.

USP - 380 dessënies de mëndri iel da sën inant da udëi tl Museum Ladin Ciastel de Tor. L assessëur provinziel ladin Florian Mussner à giaurì (ncuei) juebia ai 15 de mei la mostra. Do 10 ani iel inò unit a se l de n proiet de culaburazion danter la scolines ladines, l’Union Maestri Ladins y l Museum Ladin. I dessënies resta da udëi per doi enes nchin ai 29 de mei.

USP - Te n danmesdi de nfurmazion iel tl Academia Europea de Bulsan unì prejënta n analisa di resultac dl Studi Pisa tla scoles autes dla trëi grupes de rujeneda. L assessëur Florian Mussner à sorissà la bela paruda dla scoles autes ladines.

USP - N vënderdi ai 23 de mei unirà prejenteda tl’università a Persenon la prima pert dla Gramatica paredleda dl ladin, talian y tudësch che reverda l verb. La prejentazion unirà fata dai autëures Peter Gallmann, Heidi Siller-Runggaldier y Horst Sitta. Duc i nteressei ie nviei a chësta prejentazion y a se resservé chësc terminn.

AS - Ncuei juebia domesdì vëniel tl Museum Ladin a San Martin de Tor giaurì la mostra de dessënies de sculeies. L tai dla vëta dla mostra dedicheda al argumënt “mëndri dl museum” unirà tenì dala doi domesdi dal assessëur ladin Florian Mussner.

AS – Per l cuncors de fé conc “Kangaroo dla matematica” ie unic premiei cin sculeies ladins. 8.000 sculeies dala elementera nchin ala scola auta à fat pea l cuncors per la scoles ladines y tudësces dla Provinzia de Bulsan.

USP - L cumité de bën cin persones per l’evaluazion dla cualità dla scoles tla valedes ladines ie unit numinà dala Jonta provinziela su ncëria dl assessëur Florian Mussner n lunesc de chëst ena. “L lëur de chësc cumité ie de gran mpurtanza: mustran su i aspec positives y negatives dla scoles ie chësc lëur la fundamënta per perfeziuné la cualità de nosta scola”, nsci sotrissea l assesssëur Mussner.