Atualità

USP - La plata web dl Museum Natöra, cina sëgn scrita por todësch, talian y inglesc, é gnüda ampliada cun le ladin, le terzo lingaz provinzial. Implü po la plata web gnì cherdada sön le zelular.

USP - “La ciasa di studënc a Urtijëi é arjignada por le 1 de setëmber”, lascia al savëi l’Assessur por la cultura y la scora Florian Mussner. Tles scores altes a Urtijëi pon bele fa domanda do n post.

USP - Deboriada cun le Minister por l’istruziun Giuseppe Fioroni él gnü stabilì ai 17 de jenà 2007 a Roma les materies por le secundo ejam scrit dl ejam de maturité 2007 tles scores altes te Südtirol. Por la scora ladina ê l’Intendënt Roland Verra presënt dal’incuntada.

I proiec esecutifs dles zirconvalaziuns de Vahrn y de Longega é gnüs aprovà l’ultimo lönesc, ai 15 de jenà dala comisciun tecnica provinziala. La pert nöia dla strada de Vahrn vëgn a costè 30 miliuns de euro deperpo che la zirconvalaziun de Longega amuntëia a 8.5 milliuns de euro.

USP - Ala fin dl ann de scora 2006/07 se presentaral 48 scolars y n candidat che vëgn da foradecà, al ejam final dla scora alta tla reforma nöia. 38 candidac fajarà l’ejam te Gherdëna y 11 tla Val Badia.

USP - Sciche udù danora dala lege muessel unì fat cuntroi sun i cuntribuc culturei cunzedui dala Provinzia. L vën cialà do plu avisa l 6% dla domandes suvenzionedes tl ann 2005: chëstes unirà trates ora a cajo ai 12 de dezëmber 2006.

USP - Le forum cultural ladin che vëgn organisé anualmënter, é chësc ann gnü tignì ai 28 de otober a La Pli de Mareo cun le tema dediché al teater. Al é gnü baié dles condiziuns speziales, sot a chëres che le teater ladin se svilupëia y vëgn portè dant. L’assessur ladin Florian Mussner à sotligné l’importanza dl teater ladin por la cultura ladina.

Le forum cultural sön le teater ladin vëgn mëtü a jì dal Assessorat Provinzial y dala Consulta Ladina. Dötes les rapresentantes y düc i rapresentanc dles lies ladines y di comuns y chi che é interessà, é invià a chësta manifestaziun. Ala discusciun tolarà pert jënt che laora por le teater ladin y l’Assessur por la cultura ladina Florian Mussner.

LPA - Le Presidënt dla Junta provinziala Luis Durnwalder y l’assessur ladin Florian Mussner à daurì incö jöbia, ai 5 de otober, le Dé dla Cultura Ladina. Deperpo che l’assessur Mussner à anunzié n engagement plü sterch dla Provinzia tl sostëgn dla leteratöra ladina, à le Presidënt dla Junta provinziala confermè, che tratan le renovamënt dla convenziun cun la RAI, damanaràl plü na gran lerch por la programaziun locala tl lingaz ladin.

Le sorvisc dles insegnantes y di insegnanc gnarà aprijé sura döt le monn ai 5 de otober, le dé internazional di insegnanc. Ince l’importanza dla formaziun gnarà metüda tl interès dl publich. L’assessuria provinziala por la scora Luisa Gnecchi y i assessurs provinziai por la scora Otto Saurer y Florian Mussner tol chësta oportunité por sotligné l’importanza di insegnanc de dötes les scores y dles gradaziuns dles scores sciöch’ince dles assistëntes pedagogiches y de chëres che laóra tles scolines.