Atualità

USP - Nia ma por i scolars n’é les notes d’importanza mo bëgn ince por i insegnanc de Südtirol. Döt le personal insegnënt che à arjunt so titul de stüde pro n’université tl’Austria y ô tó pert al concurs por les scores elementares, mesanes y altes dles valades ladines mëss dè jö le zertificat de reconescimënt dl titul de stüde y ince l’atestaziun dla nota globala de stüde cina ai 20 de mà 2005 pro l’Intendënza Ladina a Balsan.

USP - En jöbia, ai 21 d’aurì 2005 à le presidënt nü dla Uniun Generela di Ladins dles Dolomites Michil Costa incuntè le Presidënt dla Provinzia Luis Durnwalder. Te na conversaziun lungia y daverta él gnü baié dla posiziun dla Uniun Generela, dla promoziun dla cultura ladina sciöche ince di massmedia ladins.

USP - Pro la sentada da inier mercui, ai 20 d’aurì 2005 s’à Comisciun provinziala por la Valutaziun dl Dann Ambiental dè jö cun le proiet por l’implant da fà nëi de Piz La Ila.

USP - Sot ala presidënza dl assessur Florian Mussner él gnü tignì l’edema che é stada döes sentades dla Consulta por la cultura ladina dla Provinzia a Corvara. Le punt plü important sön l’ordinn dl dé ê le tratamënt de presciapüch 120 domandes de porsones che laora tl ciamp dla cultura. Al é gnü spôrt n contribut de 720.000 euro.

L’intendënt dles scores ladines Roland Verra à dan da püch nominé i presidënc y i comëmbri dles comisciuns d’ejam por i ejams de stat finai tles scores altes ladines por l’ann de scora 2004/2005. Tles scores altes ladines tla Val Badia y te Gherdëna se presentaràl indöt 39 candidates y candidac ai ejams statai, de chisc dui da privatisc.

Tla sentada da en mertesc, ai 12 d’aurì 2005 à la IIª Comisciun provinziala por la sconanza dla contrada dè so bëgnstè por la costruziun de n lift da cater posc a Santa Cristina y de na strada d’azès o de na strada forestala te Mareo.

USP - “La jonëza dles valades ladines se dà dassënn da fà y les uniuns di jogn mët a jì n gröm de scomenciadies de valüta por la jënt jona. Por chësta rajun dess la jonëza ince gnì sostignida”, à dit l’assessur Florian Mussner. Sön domanda dl assessur Mussner à la Junta provinziala aprovè en lönesc, ai 11 d’aurì le plann anual por le sostëgn dla jonëza ladina.

USP - Tratan la pröma sëra de seleziun pro le “Festival da Chors” tignida en domënia, ai 10 d’aurì 2005 a Rueun tla Svizra rumancia à le cor dles ëres “Raiëta” da La Val albü n gran suzès. L’assessur ladin Florian Mussner che ê a Rueun cun la delegaziun ladina de Südtirol à podü ti fà sües mius congratulaziuns ales bones ciantarines da La Val.

USP - La scola ladina sperimenterà n l ann de scola che vën 2005/06 la reforma scolastica. L Assessëur per la scoles ladines Florian Mussner, l Intendënt dla scoles Roland Verra y l Diretëur de Repartizion Alexander Prinoth à prejentà la inuvazions chëst’ena a Urtijëi y a La Ila. “Laureron inant cun l sistem paritetich” à sotrissà l Assessëur Mussner. Ala sëires de nfurmazion à partezipà truep zitadins y truepa zitadines partezipan ala discuscion sun l svilup dla scola ladina.

USP - Pro le „Festival da Chors“ che gnarà tignì en domënia, ai 10 d’aurì a Rueun tla Svizra rumancia saràl presënt ince l’assessur ala cultura Florian Mussner. Chësta manifestaziun vëgn metüda a jì tl cheder dla colaboraziun danter i Ladins de Südtirol y i Retoromans dl ciantun Grijun. I cors ladins gnarà rapresentà dal cor dles ëres „Raiëta“ da La Val.