Atualità

Chëst’ ena che vën, dai 9 nchin ai 13 de agost 2004 tën l’aucat populer de plu udienzes.

USP – N sada 14 de agost uniral a Valdaora fat la jita - quiz tl Parch naturel Fanes – Sennes – Braies che fova unida desdida de lugio per l bur tëmp. Te chesc quiz se tratla de savëi y de ti avëi l fortl a fé juesc che vën fai sëuraprò ala dumandes sun natura, cuntreda, cultura dl luech y usanzes. Sibe granc che pitli possa fé pea chësta jita – quiz. L unirà muet dala 12.30 nchin ala 14.00 pra la ustaria „Panorama“ a Valdaora ulache n pudrà pona nchin ala 16.15 inò de jù la dumandes dl quiz.

Tl mëns de juni ne se à l aut dl’Azores nia pudù fé inant. Tl Südtirol iel stat vel dis de bel tëmp cun la prescion auta, che ie for inò unic fermei da masses de aria frëida dal nord. Purempò ie la temperatures states plu autes dla media.

USP – Da permò fej l diretëur dl Istitut Pedagogich Ladin, Theodor Rifesser pert dla Jonta dla Università liedia de Bulsan. Per pudëi to ite n rapresentant dla grupa de rujeneda ladina iel stat debujën de fé na mudazion dl statut cun n bensté da Roma. L ie mpurtant che i Ladins sibe nce rapresentei ti organs esecutives de istituzions mpurtantes, à dit l assessëur ladin Florian Mussner cun sodesfazion.

USP – L assessëur Florian Mussner se à inier domesdi, juebia 29 de lugio, ancuntà a Bulsan cun l cunselier provinziel trentin Luigi Chiocchetti. I doi rapresentanc ladins à rujenà sun la situazion atuela dla grupa de rujeneda ladina tla doi provinzies Bulsan y Trënt. Aldó de tramedoi rapresentanc ie l’ancunteda stata n var inant per na culaburazion che va inant sun basa istituzionela.

USP – Ndut ie 152 persones zapedes ite ntan l ann 2004 tla pension ulentera per la ciasarines, aldò la lege regiunela nr. 3/93. Tl ann 2003 se ova scrit ite 124 persones. Chësta zifres ie unides comunichedes dal Ufize provinziel per preudënza soziela, do che la lege finanziaria regiunela, cun l to demez dla pension dla ciasarina, ie jita n drova.

USP – I diretëures de ufize de cumpetënza per la valutazion dl dann ambientel à te si ultima setenda tëut tres de plu proiec, danter chisc nce l abiné su de ega da bever tl chemun de Badia.

USP – N lunesc ai 2 de agost uniral tla direzion “Ladinia“ dla scolines ladines a Urtijëi sëurandat 32 stieres ala maestres y assistëntes dla scolines de Gherdëina y dla Val Badia per l ann de scola che vën. La maestres y assistëntes ie nviedes per la 9 y la 10 danmesdì.

Tl’ena danter l 2 y l 6 de agost tën l aucat populer de plu udienzes. N juebia ai 5 de agost nce a Urtijëi.

USP - L termin per stlu jù i cuntrac de lëur per la stieres nia de rodul y per l asseniazion dl ncëries liedies tla scoles ladines toma n mierculdi che vën ai 4 de agost a Bulsan.