Atualità

USP – Al mond dla lijëndes ladines ie dedicheda na manifestazion de trëi sëires metuda a ji dal Assessorat provinziel per la Cultura ladina te Gherdëina y tla Val Badia.

La vela de cëses de albierch tl raion dl’Elpes ie tl ann 2003 stat de 21,7 mile mprejes de albierch cun dendut 804.800 liec. La dumanda turistica se à tl medemo tëmp mustrà cun 24,3 milon de turisc’ ruvei adalerch y cun 105,9 milion de nuetes afitedes. Chësta nfurmazions y resultac di muvimënc turistics ti raions dl Vorarlberg, Tirol, Salzburg, Bayern, i ciantons dla Svizra Tessin, Grijons, y St. Gallen, la provinzies de Bulsan, Trënt, Sondrio y Belun, vën presentei tla plata de nfurmazion dl Istitut de Statistica ASTAT, „Fremdenverkehr in einigen Alpengebieten - 2003“

OSP - En vëindres, ai 9 de messè 2004 tl’ostaria “Gran Ciasa” a La Plì de Mareo, él gnü premié i davagnadus dla pröma ediziun dl concurs leteral ladin “Auturs ladins scrî…”. Maria Pedevilla da La Plì de Mareo cun le roman “ En amur imposcibl – Na storia desco en atra” y Ivan Senoner da Urtijëi cun le roman “La ueia de pië via” é i dui premià.

USP – L 60% di lëures per la streda dla Val Badia nueva ie bele finei. Nchin a sën iel unì frabicà per 54,5 milion de Euro y nce sce n ie al mumënt n pue’tardives dessa i lëures unì finei via tl tëmp udù danora. Chësta nfurmazions à l assessëur ala stredes Florian Mussner ncuei, vënderdi ai 9 de lugio, dat inant ai ambolc y ai rapresentanc di chemuns tuchei dai lëures, pra n’ancunteda a Mantëna Todëscia.

USP – L’istituzion de n aucat per mutons y jëuni ie for plu daujin. L assessëura Sabina Kasslatter Mur, che à giapà la ncëria dala Jonta provinziela de lauré ora n cunzet per mëter sun chësc aucat, à sën metù sù na grupa de lëur che se à ncuei, juebia 8 de lugio, ancuntà per l prim iëde. „La grupa de esperc dëssa judé a mëter mpé n cunzet che tol n cunsciderazion i bujëns de pusciblmënter truep mutons y jëuni“ à sorissà l’assessëura ncuei a Bulsan.

L Istitut provinziel de statistica ASTAT à dat ora na plata sun l turism tl Südtirol ntan la sajon 2002/03. Tlo vëniel comunicà la vela dl’ativiteies che dà albierch cun la cumpëida dl’ativiteies y di liec. Mplù possen nce liejer do analises y n paredledes dla dumanda turistica (persones ruvedes adalerch y nuetes afitedes). Tl studi vëniel nce presentà n analisa di luesc turistiches plu atratives. I doi luesc ladins Corvara y Sëlva ie da abinè dancà de chësta tlassifica dan a i luesc de Schenna, Tirol y Maran.

USP – Dla situazion di lëures sun la streda dal Val Badia y sun i pruvedimënc de segurëza dajerà l assessëur Florian Mussner y i tecnics de cumpetënza nfurmazion. La sëira de nfurmazion n vënderdi, ai 9 de lugio dala 17.00 sun l post di lëures a Mantëna Todëscia, vën metuda a ji datamprima per i ambolc y i rapresentanc di chemuns nteressei.

USP – Cun vel servisc sëuraprò uël la Provinzia ti unì ncontra a chëi che muëssa paië ite la chëuta sun l auto cialan a chësta maniera de ti unì ncontra ai chëi 9% che fej mo for truep fai a paië ite. Sun pruposta dl assessëur ala finanzes Werner Frick à la Jonta provinziela ncuei, lunesc 5 de lugio, dat pro i servijes sëuraprò y la cunvenzion cun l club abtomobilistich ACI. De setëmber uniral metù man cun n scrit de nfurmazion y l fé al savëi che n pudrà nce paië ite tres internet zënza spëises.

USP- N cont de ntegrazion dëssel unì metù a jì de plu furmazion y de plu ancuntedes per miuré la comunicazion danter la scola, genitores y i servijes soziei. Chisc ie i resultac de n studi sun la cualità dla ntergrazion de persones cun handicap tla scoles dl Südtirol ntan l ann de scola 2002/03. Sun basa naziunela ie la Provinzia de Bulsan mo for danora n cont de ntegrazion soziela. I trëi assessëures ala scoles Otto Saurer, Luisa Gnecchi y Florian Mussner à presentà l studi.

USP – A Caterina Lanz, cumbatënta per la libertà de si popul ie dedicheda na mostra tl Museum Ladin a San Martin de Tor. L’ucajion de chësta mostra pieta i 150 ani dala mort de Caterina Lanz, nasciuda a Al Plan de Mareo tl 1771 y morta te Fedom tl ann 1854. La giaurida dla mostra ie n dumënia ai 11 de lugio.