Atualità

ast - N auter ann d’autonn saral sun Plan da Tieja, tl Chemun de Sëlva, la scola mesana per i doi luesc: per Sëlva y S.Cristina. Chësc ie unì comunicà inier domesdi, merdi 22 de juni, dal Assessëur Florian Mussner ai ambolc, assessëures ala scola y diretëures de Gherdëina. Tl’ancunteda a S.Crestina iel nce unì rujenà dla strutura nueva per la scola auta Raetia a Urtijëi che n ulessa scumencé a frabiché d’autonn y dla cësa di studënc che ruva te si ultima pert de proietazion. Presënc fova nce l Ntendënt Verra y l diretëur de ripartizion Prinoth.

USP – Tla scoles elemeteres ladines vëniel da chësc autonn scumencià a mëter n drova la reforma scolastica cun de pitli vares de prova. La Jonta provinziela à inier lunesc, 21 de juni, dat pró la pruposta dl assessëur Florian Mussner che vëija dant l’urganisazion, aspec didatics y pedagogics per i vares de prova. Argumënc zëntrei ie l portfolio de valutazion, l miuramënt dla cumpetënza linguistica tres prim vares de na didatica integreda de rujeneda y l nseniamënt dla nfurmatica.

Te si otava edizion presenta l rendicont dl’Aministrazion dla Provinzia de Bulsan chël che l ie unì fat y arjont ntan l ann 2003 per la populazion. L ie da pudëi liejer la scumenciadives per to demez burocrazia, miuré l’efiziënza y l ti vester daujin ala jënt, nsci schiche la maniera co che ie unic adurvei i scioldi publics. L rendicont ie da giapé tl Ufize stampa dla Provinzia o tl internet sun la plata http://www.provinz.bz.it/taetigkeitsbericht2003.

USP – Jëuni possa fé la patent per l motorin tres la scola, te na scola dl avisé o sciche privatist. Per almanca 20 nteressei, vëniel metu sù na cumiscion de ejam dal Ufize provinziel per la patent.

USP – La streda dla Val Badia unirà da nsnuet, vënderdi 18 de juni inat, giaurida ai auti ntan l fin dl’ena dl 19 y 20 de juni. Da s’ën inant iel udù danora de giaurì la streda bas ite uni fin dl’ena nchin ala giaurida ufiziela per la sajon auta. Nuef iel nce che la streda ne vën nia plu s’areda de nuet y nsci possa auti y mesuns pesoc passé sun 24 ëura.

Tl’ena danter l 21 y l 35 de juni 2004 tenirà i culaburadëures di ufizies provinziei per l artejanat udienzes tla sëntes destachedes.

USP – 32 proiec ie inó unic tëui tres dala Sgonda cumiscion per la defendura dl ambient. Sota la presidënza de Adriano Oggiano ti iel nce unì cialà a doi proiec tl Chemun de Badia.

USP – Do na preparazion ntensiva y n ejam pratich y de teoria dut auter che saurì à 96 maestri de schi y snowboarad , y dirijënc de scola pudù pië do si diplomes. Inier medri, 15 de juni, à l assessëur Thomas Widmann sëurandà i diplomes tla cësa provinziela Widman a Bulsan che ti dà l mesun de zapé ite te si leur ntan l proscimo d’inviern.

Tres la reforma dla scola che à ntan i ultimi ani bele metù man, ti vëniel a duc i sculeies dl Südtirol, dant o do, dat l’ucajion de mparé l nglëisc. Dal ann de scola 1995/96 nchin al 2002/03 ie la perzentuela de sculeies che mpera nglëisc, tenian cont da scola a scola, for auzeda: tla scoles elementeres iesen da 0,5% ruvei a 3,1%. Tla scoles mesanes ie l majer aumënt stat danter l 1999 y l 2001, paredlan la perzentuela dl 1995 cun 8,7% iesen tl 2003 ruvei a 73,7% che mpera l nglëisc. Tla scoles autes dl Südtirol ie la rujeneda nglëija bele da truep ani materia segura. Tl ann de scola 1995/96 fovel 86,% di sculeies che mparova nglëisc, tl ann de scola 2002/03 ie la perzentuela ruveda a 96,9%.

USP – Nsci sciche la ie stata pra la veles provinzieles d’autonn ie la nfurmazions y i resultac dla veles dl Parlamënt dl’Europa da pudëi liejer do tla plates provinzieles tl internet www.provinz.bz.it. La coordinazion de chësc servisc vën nce chëst iede cureda dala Südtiroler Informatik AG.