Atualità

Tl’ena danter l 26 y l 30 de auril 2004 tenirà i culaburadëures di ufizies provinziei per l artejanat udienzes tla sëntes destachedes.

Ncuei, 23 de auril, iel l di mundiel dl liber y dl nseniamënt . Per chësta ucajion publichea l Istitut Provinziel de Statistica (Astat) vel nfurmazions sun l liejer tl Südtirol. Da na nrescida generela dl 2003 ie unì a lum che l’ëiles (64%) liej de plu di ëi (40%). Chëi che liej l plu ie i mutons nchin a 13 ani: l 30% liej passa 10 libri al ann.

USP – Da ncuei mierculdi 21 de auril possa i patrons de auti a disel cun filter per l stuep damandé de nia messei paié la chëuta sun l auto per un n ann. La norma che ie unida metuda sù sun pruposta di assessëures Werner Frick y Michl Laimer va ndrova per l prim iede tl Südtirol. Tres na zirculera vën i marcadënc de auti nfurmei sun la normes nueves.

La Consulta culturala ladina é rovada adöm ai 15 d’aurì tl Museum Ladin a San Martin por le pröm iade do la sentada costituënta cun so Presidënt Florian Mussner por tratè les domandes de finanziamënc ales uniuns. Aladô dl arat dla Consulta ciafarà les uniuns culturales ladines por ativité o investimënc 401.000 Euro. Por le proscimo ann gnaràl laurè fora n conzet nü por le finanziamënt dla cultura ladina.

Maria Pedevilla de La Plì de Mareo y Ivan Senoner de Urtijëi à davangné la pröma ediziun dl concurs leterar ladin “Auturs ladins scrì …”, metü a jì dal Assessorat provinzial por la Cultura ladina

USP – La Junta provinziala à aprovè inier lönesc ai 19 d’aurì i critêrs nüs por l’assegnaziun di posc de laûr tla scolina. Les maestres y assistëntes à tëmp cina ala fin d’aurì por fà domanda de laûr a tëmp plëgn o parzial tla scolina o de trasferimënt por l’ann de scora 2004-05. La Repartiziun dl personal dla Provinzia fajarà n domisdé de informaziun por les scolines ladines en mercui, ai 21 d’aurì a La Ila.

La steda dl Jëuf dl Sela resterà bonamënter sareda nchin duman, merdi ai 20 de auril.

USP – L presidënt dla Provinzia Luis Durnwalder sa à ancuntà cun Stephan Lausch y n valgun autri rapresentanc dla Scumenciadiva per plu Democrazia pe rujené dla pruposta de lege sun la decijions dla populazion. N referendum dëssa me uní fat per decijions che à da n fé cun duc i zitadins o per cuestions de basa sun l svilup dla provinzia, miena l Presidënt dla Provinzia.

Usp – Per milesc de auti ne iel ntan i ultimi cater ani nia unì paià ita sciche toca la chëuta. Aldò dl Ufize Provinziel per la Chëutes nen fovel ntan l ultim ann ntëur 25.000. L lëur che se damanda truep tëmp y organisazion ie sën duvier dla Provinzia. L assessëur ala finanzes Werner Frick cunsiëia de paië ite tres sitemes segures sciche l internet, la butëighes autorisedes o tres l ACI.

Usp – Chëi che mantën si puscion tl respet dla natura unirà nce chëst ann premiei dala Union Europea y dala Ripartizion per Natura y Cuntreda. Per l sië de prei speres, prei da mont cun truepa ierbes defrëntes, prei y pastures da leresc, l nia vardé te palusc y l mantenimënt de arjëies veniel dat ora pesc’. Chëst ann possen nce damandé do l pest per la cura de bosc da castania y i prei cun lëns da versura sparpaniëi.