Atualità

Per mëter la nfurmazions dla popluazion residënta a disposizion dl publich, à l Istitut de Statistica dat ora l liber nuef dla statisiches. L fin de chësta publicazion ie chël mëter a disposizion la nfurmazions statistiches per l svilup y la strutures tl Südtirol. Na majera pert ti ie unida dedicheda al paradlé cun l’Europa, per chël iel nce unì tëut ca nfurmazions dal Eurostat (Institut per Statistica dla Union Europea) y dal Istat (Istitut naziunel de Statistica).

L tëmp ntan l mëns de dezëmber ie stat drët defrënt, ala fin ora à perturbazions dal Mer Mediteran purtà truepa pluëia y nëif sun la montes. Chesc ie dantaldut unit a se l dé a sud dla Provinzia. Te truep luesc ie l dezëmber stat massa tume, la temperatures ie n generel restedes sëura la media di ani passei.

La cumpëida de desgrazies, morc y tei che se à fat mel tol ju. Tl ann 2002 iel suzedù 2.060 desgrazies, 1,4% demanco dal ann dant. Mendra fova nce la cumpëida generela de 2.665 persones che se à fat mel (-4,6%). N media fejel ora plu de set ferii al di. La cumpëida di morc sun streda ie caleda da 97 tl ann 2001 a 89 morc ntan l 2002.

Tl ann de scola 2002/03 fovel 84,5% di sculeies dla scoles autes che ie jic te una dla cater majera ziteies, Bulsan, Maran, Persenon o Burnech a scola.

Usp – Nchin ai 2 de fauré possa lies che se da jù tl ciamp sozio-saniter, fé dumanda per n sustëni per l ann passà 2003. De chësc di lecorda l Ufize provinziel per i spediei.

Usp – I ambolc y i rapresentanc di cunsorc turistics de Badia y Gherdëina se à nacuntà ntan l fin dl’ena cun l assessëur Florian Mussner per rujené dl muvimënt sun i jëufs. L ie unì rujenà de soluzions per smendrì l problem dl gran muvimënt di auti sun Frea y l Sela, y nce de co la mëter a ji miec tla doi valedes. De merz ulessen te n cuvëni a tlausura ruvé a na soluzion deberieda cun l assessëur ladin Mussner y l assessëur al muvimënt sun streda Thomas Widmann; te chësta ucajion unirà nce presentà l studi dl Eurac dl muvimënt sun i jëufs.

Usp – l Ufize provinziel per l sprot lecorda che la dumandes per aiuc y cuntribuc ordineres per l’atività sportiva y dl tëmp liede, l anjenié de njinies, per cursc de furmazion o per miuré mplanc dal sport y tëmp liede, possa unides dates ju nchin l lunesc ai 2 de fauré 2004.

Usp – L ji ora de purtoi, sibe cun la peves, cun l snowboard y cun i schi ne ie nianca per i plu esperc segur dala levines. Per straverdè da periculi ie l servisc levines provinziel che lëura ora la nfurmazions sun la cundizions dla nëif, l svilup dla cundizions metereologiches y l livel dl pericul da levines. L boletin possa unì damandà do tres telefon, fax, internet y da n struf nce tres teletext.

Le terminn por de jö les domandes è ai 2 de forà 2004.

Usp – Sce n raport persunel garata, depënd n gran pert dala comunicazion garateda. Manieres per mëter a ji miec n raport persunel, possa nteressei mparé te n curs metù a ji dala scola profesciunela per l soziel de rujeneda taliana. Chësc curs vën tenì dal 14 nchin al 16 de jené tla scola per l soziel de Maran.