Atualità

OSP – L Südtirol se bat tres pra la cumiscion dl EU. La direzion di marceies nteranziunei ne jirà nia contra la marca „Südtirol“. Bele plu mënsc iel unì pustejà cun i nciariei dl’EU, ncuei juebia ai 23 à l Assessëur per l’Economia giapà la parola dl diretëur dla cumiscion europea per i marceies nternaziunei Guido Berardis. La marca „Südtirol“ pudrà nsci nce unida adurveda tl daunì.

OSP - La cualità de vita per la jënt de Pruca ie da ncuei ino mieura. Cun la giaurida ai auti dl tunel nuef da pert dl Presidënt dla Provinzia y dl Assessëur ai Lëures Publics vën l luech de Pruca taià ora dala fuera, dal mpanziamët dl’aria y dal pericul sun streda gaujà dal muvimënt di auti che furnea te Gherdëina. Ncuei danmesdi, ai 22 de utober ie l tunel nuef unì mplenì da na gran cumpëida de jënt che à festejà la giaurida tan aspiteda, dan lascé passé i prim auti. Da mesdì an bele pudù furné tres l tunel nuef de 420 metri che à custà ntëur a sies milion de Euro.

OSP – N juebia ai 23 de utober uniral batù tres l terzo tunel dla streda nueva dla Val Badia. I lëures per la streda ite per la bassa Val Badia va inant drët bën. La streda, che vën nuzeda dassënn per l trasport de persones y per l trasport pesoch vën fata da nuef, slargeda y segureda da sasc che manacia de tumé jù.

OSP – Ala fin de jené 2004 uniral inò ora l liber dai cursc "Zeit für Weiterbildung". Urganisazions, lies y firmes che mët a ji manifestazions de furmazion nchin de agost 2004 tla rujeneda ladina y tudëscia, possa se mëter n cuntat cun l ufize per la furmazion nchin ai 10 de nuvëmber.

La populazion dl Südtirol crësc de 1.219 persones y ova ala fin de juni 2003 na cumpëida de 469.448 persones. Tl sgondo trimester 2003 iel unì cumpedà 11,6 nasciui sun 1.000 zitadins y 7,9 morc sun 1.000 zitadins. La cumpëida de jënt che ie ruveda adalerch de 3.033 y de chëla che se n ie jita da tlo, de 2.245, ie aumenteda permez al ann passà. Ndut ie l saldo danter chësta doi zifres, positif cun n aumënt de 788 persones.

Tl’ena danter l 20.10.2003 nchin ai 24.10.2003 tenirà i culaburadëures di Ufizies Provinziei per l Artejanat udienzes tla sëntes destachedes.

OSP - Cinch sun sies mutans dla nueva scuadra naziunela taliana dl saut ie dl Südtirol, plu avisa de Gherdëina. A Bulsan iel unì presentà la scuadra dl’ëiles cun la presënza dl Presidënt dla Provinzia de Bulsan, dl Assessëur per l turism y dl Assessëur ladin. Dal Assessorat per l turism y cuestions alpines vëniel sustenì la scuadra nueva che purterà l inuem dl Südtirol pra la garejedes nternaziuneles de saut.

OSP – L mierculidi che vën sarà n di de festa per l luech de Pruca. L presidënt dla Provinzia y l assessëur per i lëures publics giaurirà l tunel dl netreda te Gherdëina do che l ie unì laurà dassënn per doi ani. A chësta maniera unirà l luech de Pruca straverdà dal gran muvimët de auti tres si zënter

OSP - L fé su de n ITC nuef a Urtijëi ie uni dat pro dala Cumscion Tecnica Provinziela deberieda cun proiec a Bulsan, na pert nueva per l spedel de Bulsan, l fe su da nuef de na scola a Welschnofen y l renuvamënt dl Chemun de Mühlbach. Chesta decijions ie unides tëutes tla senteda dl lunesc ai 6 de utober.

OSP - Danter i ponc al orden dl di dla senteda dl Guviern Provinziel de n lunesc ai 6 de utober iel danterauter nce uni trata dla puscions dla vedla streda dla ferata ti Chemuns de Urtijëi y Sëlva.