Atualità
Dezijiuns dla Comisciun por la Valutaziun dl Dann Ambiental (VDA)
USP - Pro la sentada da inier mercui, ai 20 d’aurì 2005 s’à Comisciun provinziala por la Valutaziun dl Dann Ambiental dè jö cun le proiet por l’implant da fà nëi de Piz La Ila.
Vigni iade che n proiet nü va sura certi limić fora y à n majer influs sön l’ambiënt vëgnel conscidré avisa dala Comisciun por la Valutaziun dl Dann Ambiental (VDA), metüda adöm da ot comëmbri. Al vëgn valuté avisa ći conseguënzes che i proieć à sön la natöra, les porsones, i tiers, les plantes y la contrada. Spo dà jö la Comisciun VDA n arat che n’é nia liënt por la Junta provinziala. Le vare che vëgn do é spo chël de ti presentè le proiet cun l’arat dla Comisciun VDA ala Junta provinziala. Inier à la Comisciun VDA inće ejaminé y spo aprovè la domanda de mudaziun dles prescriziuns por le proiet dl implant da fà nëi Piz La Ila tl comun de Badia. Le proiet vëiga danfora de aumentè la condüta dal’ega por les pistes “Gran Risa”, “Altin”, “Bambi” y “Pre da Crof”. Tl tëmp dan Nadè pol insciö gnì adorè 47.000 metri cubich d’ega por fà nëi, chësc ô dì n aumënt da 30 a 48 litri d’ega al secunt. La conzesciun vel ćina al 2007; spo gnarà la cuantité bel plan arbassada deache al gnarà fat sö resservars dal’ega.USP
