Atualità
Nominaziun dl Consëi d’Istitut dl Istitut Cultural Ladin “Micurà de Rü”
USP - L’Istitut Cultural Ladin “Micurà de Rü” se dà jö cun le mantegnimënt y la promoziun dl lingaz y dla cultura ladina. Tignin cunt dles propostes dles assoziaziuns culturales de Gherdëna y dla Val Badia à la Junta provinziala nominé, en lönesc ai 29 d’agost 2005, le Consëi d’Istitut nü dl Istitut Cultural Ladin “Micurà de Rü”. “L’Istitut à na funziun determinanta no ma por le mantegnimënt mo ince por le svilup de nosta cultura ladina” à dit l’assessur Mussner.
Sön domanda dl assessur Florian Mussner à la Junta provinziala nominé le Consëi d’Istitut nü dl Istitut Cultural Ladin “Micurà de Rü”. L’Istitut Cultural ladin mët a jì y promöi scomenciadies che porta pro al mantegnimënt y ala promoziun dl lingaz y dla cultura ladina en general. Al dà fora libri por ladin mo inće te d’atri lingac sön argomënć che reverda le monn ladin, dantadöt le lingaz y la cultura ladina. “Lingaz, storia y cultura ladina vëgn studià dër avisa y cun costanza tl Istitut Ladin por che la jënt ti pois pormez plü saurì a chëstes tematiches” à splighé l’assessur Mussner. L’Istitut Cultural Ladin é implü inće post de incuntada y de barat cun les atres cultures de mendranza. “Tres n barat de pinisers y esperiënzes vëgnel portè plü savëi sön nosta cultura no ma tles valades ladines mo dantadöt te posć foradecà” à alzè fora l’assessur Mussner. Le Consëi d’Istitut à le compit de sostignì les scomenciadies culturales desvalies mo inće de portè dant instës val’iniziativa. D’importanza él sambëgn inće la colaboraziun cun les atres istituziuns culturales y scores dla Provinzia. Dl Consëi d’Istitut nü fêjel pert Hugo Valentin da Falzes/Issing sciöche rapresentant ladin dla Junta provinziala, Bruno Senoner de Urtijëi, Herwig Prinoth de Urtijëi y sües sostitutes Elfriede Perathoner de Urtijëi y Beate Senoner de Sëlva sciöche rapresentanć dles assoziaziuns culturales de Gherdëna. I rapresentanć dles assoziaziuns culturales ladines dla Val Badia é Tone Gasser da San Martin de Tor y Erika Castlunger da Corvara cun sü sostituć Hubert Irsara da Badia y Vito Zingerle da San Martin de Tor. Dl Consëi fêjel inće pert Nadia Nocker de Sëlva y Othmar Costabiei da Corvara en rapresentanza di comuns de Gherdëna y dla Val Badia, l’intendënt dles scores ladines Roland Verra, le diretur dl Istitut Pedagogich Ladin Theodor Rifesser y le diretur dl Istitut Cultural Ladin Leander Moroder. L’assessur Mussner rengraziëia i comëmbri dl Consëi d’Istitut da denant por so impëgn y ti aoda ai comëmbri dl Consëi nü suzès y tröpa ligrëza te so laûr por la cultura ladina. La pröma incunatada dl Consëi d’Istitut nü gnarà tignida en sabeda, ai 17 de setëmber 2005 a San Martin de Tor.USP
