Atualità
Incuntada cun i Presidënc de Südtirol, dl Trentin y de Belun: i ombolc é i rapresentanc di Ladins incër le Sela
I ombolc sciöche rapresentanc di comuns lità dala popolaziun é l’organism ofizial de rapresentanza di Ladins incër le grup dl Sela. Ai podarà s’incuntè autonomamënter te na Conferënza permanënta di ombolc ladins y por proiec te ciamps desvalis podarài se joè de assoziaziuns y istituziuns raionales. Chësc é ci che é gnü fat fora en lönesc, ai 19 de setëmber 2005 a Balsan pro na incuntada danter le Presidënt dla Provinzia Luis Durnwalder, so colegh trentin Lorenzo Dellai y le Presidënt dla Provinzia de Belun Sergio Reolon, l’assessur Florian Mussner y düc i 19 ombolc dles cinch valades ladines.
La creaziun de n organism de rapresentanza por i Ladins incër le Sela é stè l’argomënt prinzipal dla incuntada dl Presidënt dla Provinzia Durnwalder, dl Presidënt dla Provinzia de Trënt Dellai, dl Presidënt dla Provinzia de Belun Reolon y dl assessur Mussner cun i trëi ombolć ladins de Fodom, Col Santa Lizia y Cortina, i set ombolć de Fascia, i ot ombolć de Gherdëna y dla Val Badia y l’ombolt de Ćiastel sciöche rapresentant di interesc dla fraziun ladina de so comun. N organism metü adöm dai 19 ombolć di comuns ladins dess tl dagnì surantò la rapresentanza dl grup etnich ladin incër le Sela. I ombolć se darà jö cun i problems desvalis di Ladins y ćiararà de ciafè soluziuns, à dit Durnwalder. „Canche la Conferënza di ombolć metarà a jì proieć ti seturs desvalis y laurarà fora programs podaràra trà ite les organisaziuns y les istituziuns locales che laora bele da agn te chisc ćiamps, sciöche por ejëmpl La Uniun Generela di Ladins, i Istituć pedagogics y de cultura y i.i. por le ćiamp dla cultura” à splighé Durnwalder. “Cun chësta incuntada éson rovà n pü plü dlungia al’unité di Ladins deache te chësta indunada s’à düć i ombolć di comuns ladins y i Presidënć dla Provinzies dè jö deboriada cun i interesc di Ladins” à alzè fora le Presidënt dla Provinzia de Trënt Dellai. L’istituziun de na Conferënza di ombolć é na poscibilité implü pitada dala lege por ester bogn da rapresentè damì i interesc di Ladins, à dit Dellai. Inće le Presidënt dla Provinzia de Belun Reolon é stè contënt dla incuntada y di resultać arjunć. „Chësta indunada é stada n momënt d’incuntada de gran importanza olach’al é gnü metü“, insciö à dit Reolon, „la pera de fondamënta por na bona colaboraziun danter i comuns ladins sura i confins provinziai fora“. Durnwalder, Dellai y Reolon à te chësta ocajiun bele podü mostrè sö n ejëmpl concret por la colaboraziun danter les provinzies: ai à sotescrit le protocol d’acordanza interregional por la candidatöra dles Dolomites a patrimone natural mondial dl’Unesco. Ara se trata de n’acordanza dles provinzies de Balsan, Trënt y Belun adöm ales provinzies de Prodenone y de Udin. Te chësc protocol é les aministraziuns publiches locales dles cin provinzies a öna de tignì adöm por ći che reverda la candidatöra dles Dolomites a patrimone natural mondial.UV
