Atualità
Di dla cultura ladina ai 20 de utober 2005 a Bulsan
N juebia ai 20 de utober uniràl tenì per l terzo iede tl Parkhotel Laurin a Bulsan l “di dla cultura ladina”. L travert de chësta scumenciadiva ie chël de traté tematiches che tóca da daujin la grupa de rujeneda ladina y che possa nce nteressé l’autra grupes linguistiches. L tema dl di dla cultura ladina de chëst ann reverda i toponims ladins y si regulamënc puscibli. L cunvëni porta l titul “Ladinische Ortsnamen – Welche Regelung?” y vën urganisà dal Assessorat per la cultura ladina.
La toponomastica ie na tematica de chëla che l vën te Südtirol suënz rujenà y pustejà. Te chësta ancunteda cëlen de la luminé dal pont de ududa dla rujeneda ladina. L cunvëni che vën tenì n juebia, ai 20 de utober, tl Parkhotel Laurin a Bulsan vëij danora chësc program:Dala 9.00 danmesdi purterà l Presidënt dla Provinzia, Luis Durnwalder, y l Assessëur per la cultura ladina, Florian Mussner, si saluc. Da dedò fajerà l Diretëur dla Repartizion Cultura y Ntendënza ladina, Alexander Prinoth, na ntroduzion ala tematica.
Dala 9.15 inant iel po sun l program:
- Cristian Kollmann, toponomast, che rejona sun la tematica dla soluzions puscibles per Südtirol. Si referat à l titul “Toponomastik, welche Lösung für Südtirol?”
- Fabrizio Bartaletti, prufessëur dla Università de Genova, che tën n referat dal titul “I nomi di luogo come espressione culturale e geografica e come punto di forza dell’immagine turistica”.
- Lois Craffonara, linguist, cun si referat “Negative Aspekte in der Behandlung der ladinischen Toponomastik”.
Ntëur la 11.15 passeran a na discuscion pra na mëisa turonda cun l Assessëur Mussner, Hermann Berger, cumëmber dla Cumiscion paritetica per la toponomastica, Edmund Dellago, espert de rujenedes, Cristian Kollmann, toponomast, Fabrizio Bartaletti dla Università de Genova, Lois Craffonara, glottologh. La moderazion dla discuscion vën fata dal jurnalist dla RAI-ladina Erwin Frenes. La discuscion durerà plu o manco nchin la 13.00.
L cunvëni ie daviert al publich. I media ie duc nviei a tò pert al cunvëni per l di dla cultura ladina, n juebia, ai 20 de utober, dala 9.00 danmesdi inant, tl Parkhotel Laurin a Bulsan, y a nfurmé l publich.
USP
