Atualità
Dé internazional dl’insegnanta y dl insegnant (Unesco)
Le sorvisc dles insegnantes y di insegnanc gnarà aprijé sura döt le monn ai 5 de otober, le dé internazional di insegnanc. Ince l’importanza dla formaziun gnarà metüda tl interès dl publich. L’assessuria provinziala por la scora Luisa Gnecchi y i assessurs provinziai por la scora Otto Saurer y Florian Mussner tol chësta oportunité por sotligné l’importanza di insegnanc de dötes les scores y dles gradaziuns dles scores sciöch’ince dles assistëntes pedagogiches y de chëres che laóra tles scolines.
Ai 5 de otober gnaràl tignì te 100 Paîsc sura döt le monn le dé internazional dles insegnantes y di insegnanć, che é gnü stabilì dala Unesco. “Al é un di compić plü responsabli te nosta sozieté chël de acompagné mitans y mituns, jones y jogn sön so tru de formaziun y de ti dè impara valurs y savëi”, chësc sotlignëi l’assessuria por la scora Luisa Gnecchi y i assessurs por la scora Otto Saurer y Florian Mussner ti desmostran insciö ai insegnanć, ales maestres dla scolina y ales assistëntes pedagogiches süa importanza.Le dé internazional dl’insegnanta y dl insegnant à inće le compit de portè ite l’importanza dla formaziun tl interès publich. “Le laûr de formaziun che porta früć ne sozed nia mâ insciö, mo iadedô él engagement, energia y coraje – y sambëgn la ligrëza da laurè cun jënt jona”, insciö dij Gnecchi, Mussner y Saurer. Bele da dî àn capì che la basa de n svilup positif de n Paîsc é la formaziun, a n livel economich, cultural sciöch’inće sozial.
“La formaziun vëgn metüda dër alalt chilò te Südtirol, i ùn n bun livel d’avalianza de formaziun y de chances y dër de bugn resultać te confrunć internazionai” cun chësc é l’assessuria y i assessurs a öna; chisc resultać é gnüs arjunć dantadöt cun le sorvisc y la profescionalité dles insegnantes y di insegnać, che rapresentëia “l’os dl spiné” dl sistem de formaziun.
“I ne podun mai se desmentié che la formaziun é na gran acuisiziun deache te tröć Paîsc ne n’é le dërt de formaziun nia assiguré”. Porchël po Südtirol aprijé ćiamò deplü so sistem de formaziun tan desvalì y ecuilibré, che ti pîta ala jënt jona tröpes poscibilitês che porta prò a n svilup personal.
“I oressun rengrazié dötes les insegnantes y düć i insegnanć sciöch’inće les assistëntes pedagogiches y chëres dles scolines por so sorvisc y i ti augurun tröpa forza y abilité por les situaziuns nöies ch’ai mëss tres indô afrontè”, dij Saurer, Gnecchi y Mussner por stlü jö.
USP
