Atualità

Scora / Cultura | 30.10.2006 | 16:50

Le forum cultural ladin 2006: Le teater tl zënter

USP - Le forum cultural ladin che vëgn organisé anualmënter, é chësc ann gnü tignì ai 28 de otober a La Pli de Mareo cun le tema dediché al teater. Al é gnü baié dles condiziuns speziales, sot a chëres che le teater ladin se svilupëia y vëgn portè dant. L’assessur ladin Florian Mussner à sotligné l’importanza dl teater ladin por la cultura ladina.

En sabeda, ai 28 de otober 2006, él gnü metü a jì le forum cultural anual dediché ala tematica sura le teater ladin. Le referat de Valentina Kastlunger cun le titul “La situaziun dl teater ladin – danter tradiziun y inovaziun” é stè l’introduziun al forum. Ara à laldè la bona posiziun che le teater amatorial tol ite tles valades ladines. Les uniuns dl teater tla Val Badia y te Gherdëna à n program de ativitês dër rich y desvalì. Implü à Kastlunger sotligné le debojëgn de mantignì le teater tradizional, mo de avëi tl medemo tëmp le coraje da se mëte sön trus nüs y inovatifs.

La descusciun finala incër la mësa torona sura le teater ladin é gnüda moderada da Leo Senoner. Ala descusciun à tut pert l’assessur por la cultura Florian Mussner, le surastant raional dla uniun dl teater de Südtirol, Heinrich Willeit, la presidënta dla uniun dl teater de Urtijëi, Marlis Moroder, le regist y joblere Rudi Avi, le presidënt dla uniun dl teater da La Ila Edi Crazzolara y Erika Castlunger, esperta tl ćiamp dla didatica dl teater. Tla descusciun él gnü baié de deplü temesc danter l’ater dles dificultês che les uniuns dl teater à da ćiafè le test ladin adatè al tòch teatral. I tòć de teater mëss feter düć gnì traslatà tl ladin. N’atra problematica é chëra che i grups da teater ladins n’à nia la poscibilité de portè dant sü tòć teatrai fora dles valades ladines deache le ladin ne vëgn nia capì tles valades talianes y todësces. Al é inće gnü baié dla funziun pedagogica importanta dl teater, dantadöt tles scores; chëstes po da süa pert inće ti dè motivaziuns y idees nöies al teater ladin. L’assessur Mussner à azentuè l’importanza dl teater tl svilup dla cultura ladina te Gherdëna y tla Val Badia y ti à sport n lalt a düć chi che laora tl ćiamp dl teater por so impëgn a bëgn dl teater ladin.

USP

Galaria dales fotografies