Atualità
Stieres te scolina: ai 11 de juni la sëurandata
USP – N mierculdi ai 11 de juni uniral sëurandat de ndut 27 stieres tla scolines ladines per l proscimo ann de scola. Maestres che ie tla graduatories per trasferimënc y per ncëries a tëmp determinà ie nviedes tla direzion dla scolines a Piculin.
Per l ann de scola 2008-09 unirà tla scolines ladines sëurandat 14 stieres per maestres (9 a tëmp plën y 5 a mez tëmp) y 13 stieres per culaburadësses pedagogiches (9 a tëmp plënn y 4 a mez tëmp). Leprò vën mo trëi stieres nueves per maestres cualifichedes per l’intergrazion. La sëurandata aldò dla graduatories unirà fata dala trëi domesdì inant tla sënta dla direzion dla scolines ladines a Piculin.
Per l ann de scola nuef ie stat debujën de na reduzion dl orar tla scolina a Lungiarü. “Davia che l ie demanco sculeies son stai sfurzei a scurté l servisc nchin ala un do marënda, mpede l tenì nchin ala trëi domesdì sciche l ie tl’auta scolines” spiega la diretëura Edith Ploner.
N autra nuvità per l proscimo ann de scola ie unida metuda a ji tla scolina de Sureghes, tla frazion ladina dl Chemun da Ciastel. “Davia che l ie nce stat truep nteres da pert di genitores, saral d’autonn na sezion nueva per i plu pitli sota 3 ani” nscì la diretëura Ploner.
La cumpëida di mëndri tla 17 scolines dla Val Badia y de Gherdëina cun si 35 sezions, ie feter valiva permez al ann passà. Per l autonn, iel te chësc mumënt 714 scric ite. Permez al ultimo autonn ie la cumpëida de ndut me aumenteda de doi.
N majer mpëni per la respunsables, maestres y culaburadësses dla scolina ladina cumporta daniëura mutons di emigranc. Bele ntan chësc ann de scola iel te Gherdëina y tla Val Badia stat 31 de tei caji de mëndri cun tramedoi genitores da oradecà, che rejona 15 lingac defrënc.
as
