Atualità
Rengraziamënt y auguresc per la fin dl’ann de scola
L ann de scola che se fina ie de segur stat bëndebò positif. De gra al bon tlima de descuscion y de culaburazion danter respunsabli dla scola y nsenianc, genitori y studënc iel stat mesun ruvé a soluzions consensueles sun deplù ponc de gran mpurtanza per l daunì de nosc model de istruzion dla valedes ladines. Nsci an pudù arjonjer formulazions che vën purtedes da duta la pertes n cont dl desseni de lege sun la scolina, la scola elementera y la scola mesana, che vën iust sën tratà tl Cunsëi Provinziel.
N spera che chësc spirt positif de culaburazion vënie nce purtà inant via per l ann de scola che vën, canche n messerà elaburé i cuntenuc di urientamënc educatives nueves.
L ie stat mesun arjonjer de bon resultac nce tla rilevazions sun la cumpetënzes di sculeies dla prima tlasses dla scoles autes, n gaujon dl studi PISA y chësc desmostra che l lëur de preparazion ie stat gobalmënter bon. Nce tl daunì cialeran de museré la cumpetënzes cuncretes di sculeies ala fin de uni scialier de istruzion, metan man cun la cumpetënzes plurilingueles.
L ann de scola che ie tl lëur de finé ie nce unì caraterisà da inuvazions mpurtantes per chël che à a cie fé cun i debic formatives di sculeies che muessa unì recuperei tres cursc aposta tla scoles autes y dala nueva prova naziunela de conc y rujenedes tl ejam de scola mesana. Dut chësc se à damandà n gran lëur urganisatif y de chësc ulons rengrazië duc i culaburadëures dla scola.
Particularmënter ulëssen ti mbincé dut l bon ai candidac di ejams tla scoles mesanes y per l ejam de stat. Chësc vel per sculeies ladins te nosta scoles y nce per chëi tla scoles ora dla valedes ladines.
La scola y scolina ladina ie na fundamënta basilera per l daunì de nosta populazion, ulon se mpenië deberieda acioche les sibe for plu tla cundizion de unì ancontra ai debujens y ala aspetatives de promozion soziela y culturela de nosta jënt.
Cun chësc ulons mo auguré de bona feries a duc i culaburadëures dla scola y a duc i sculeies y de bela sudesfazions cun i resultac dl ann de scola 2007/08.
Rengrazi nce duc i culaburadëures y la culaburadësses dl’aministrazion dla scola, y duta la istituzions che lëura deberieda cun la scola, sciche l Istitut Pedagogich Ladin, l Istitut Micurà de Rü y la Facultà de Scienzes dla Furmazion a Persenon.
A duc n bel instà!
L assessëur Florian Mussner y l ntendënt Roland Verra
usp
