Atualità
Dala Jonta Provinziela dl 16 de juni
USP - Te si senteda de ncuei (lunesc 16 de juni) à la Jonta dla Provinzia de Bulsan dat pro na lingia de pruvedimënc soziei, economics, de furmazion y cultura. L presidënt Luis Durnwalder à prejentà i ponc de majera mpurtanza.
“Sce l vën śarà l’ultima butëiga te n luech va nce perdù n pont soziel y culturel ulache la jënt se anconta. Chësc fej pert dla cualità de vita y l unì a mancë dl’ultima butëiga cumporta perchël n smëndrimënt dl standard de vita” à dit l presidënt Durnwalder. Acioche nce la butëighes ti nuesc ne muessa nia śaré iel unì dat pro de ti jude cun cuntribuc. Per lëures de restruturazion y adatamënt vëniel bele dat 15% dl custimënt. Sce te n luech iel me plu doi butëighes ie chësc cuntribut unì auzà de mo ntant ruvan a 30%. Sce l ie me plu na sëula butëiga te n luech, dà la Provinzia n aiut dl 40%.
Cuatieres soziei
N cont dl mënder fit che possa unì ratà dal Istitut per l Edilizia Soziela (IPES) dij l Stat che l muessa unì curì almanco l custimënt de manutenzion y aministrazion. L Jonta Provinziela ie dla minonga che te caji cun puech davani ne al nia bert raté chësc mënder fit y pona dé cuntribuc soziei. Nsci iel una dat pro de garantì la cundizions minimes de vita y à mudà l regulamënt. La Provinzia se tën la lidëza de fé ora l mënder fit aldò di caji. L majer fit che l possa unì ratà resta unfat sciche al livel naziunel, calculan nchin a 25% dl davani dla familia.
Sce l ie me persones singules che vif te n cuatier soziel iel debujën de deferenzié danter truepa categuries. La Jonta Provinziela uel lauré ora n regulamënt per di avisa a chi che l possa unì lascià do l fit. Chësc regulamënt unirà pona dat inant al Cunsëi Provinziel y ala Consulta di Chemuns per l bënsté.
Programs per mëndri ntan l instà
Da pert dla Provinzia ie unì dat pro n cuntribut de 3,5 milions de Euro per sustenì programs per mëndri y jëuni ntan l instà. La scumenciadives pieta dantaprima servijes de scolina, mparé rujenedes, jites y cunëscer la natura.
Aiuc per families
La Jonta provinziela ie jita inant cun i pruvedimënc per judé la families n cont dl valor de compra y dl custimënt dla vita. L pachetl di 30 pruvedimënc unirà stlut ju proscimamënter y pona prejentà ai prim de lugio.
La Jonta à tratà i prinzipies da tenì n cunsciderazion canche la se trata dl lëur de imigrei. N uel ti unì ancontra ala dumanda economica che lauranc che vën da paejes dla Comunità Europea. “Per lauranc che ne vën nia dala Comunità Europea iel debujën de pruvedimënc per garantì orden y giustizia” à dit Durnwalder. Tla proscima sentedes dëssel unì tëut na decijion definitiva.
Matura prufescionela
La cumpetënza per pudëi di sce do la scola prufescionela possen fé l ejam de stat (matura) ie ruveda dan suneria costituzionela. L Stat talian dij che la Provinzia de Bulsan ne à nia chësta cumpetënza. Te Jonta Provinziela iel unì fat ora de ji inant per defënder chësta rejon. Aldò di aministradëures provinziei dëssen cun la scola prufescionela y cun cursc de spezialisazion pudëi fé l ejam de stat (matura) y nscì, n cajo, nce pudëi se scrì ite al’università.
Chëutes sun l ciarburant
Ala Provinzia ti iel unì trat dant che la davaniessa pea cun l auzé dl priesc dl penzin. L presidënt Durnwalder à stlarì che ala Provinzia ti val na pert aldò dla cuantità y nia aldò dl priesc. Sce i priejes va su y l vën cumprà manco penzin, giapa la Provinzia nce demaco. La chëutes ie de 0,4213 Euro al liter de diesel y 0,5614 al liter de penzin. La Provinzia, nscì Dunrwalder, ne possa te chësc cajo nia renunzië sun si pert dla chëuta che fej ora l 90%.
Restruturazions cultureles
La Jonta Provinziela à dat pro n cuntribut de 1.868.000 Euro per cumedé ca opres y strutures de valor culturel.
La Strada/Der Weg
La Jonta à fat ora che l vënie metù a desposizion lueges cunvenzionedes de terapia tla strutures che fej pert dl’urganisazion de assistënza La Strada/Der Weg. L se trata plu avisa de 14 lueges tla strutura de S. Isidor a Bulsan, 12 lueges tla strutura dla Mont S. Ujep sëura Algund y 6 lueges tla comunità de persones che à debujen.
as
Galaria dales fotografies
La Jonta dla Provinzia autonoma de Bulsan – Südtirol.
