Atualità

Trafich | 25.06.2008 | 17:42

De plu lueges dai auti pra la stazion dla ferata a Pruca

USP – L’acurdanza per mené y mantenì la lueges dai auti y pertes dla streda cun i parëies contra la fuera pra la stazion dla ferata a Pruca ie unì sotscrita ncuei, 25 de juni. A una iesen ruvei danter l assessëur ai lëures publics Florian Mussner, l assessëur ala mubilità Thomas Widmann, reprejetanc di chemuns nteressei y i respunsabli dla ferata dla RFI, la Rete Ferroviaria Italiana.

Sun la puscion dla ferata a Pruca ova la Provinzia ultimamënter fat na plaza dai auti sun la pert a sud, n rundel, na plaza per trëi curieres y n parëi contra la fuera de 230 metri. Chisc lëures à custà de ndut 1,4 milion de Euro. „Cun duc chisc ntervënc iel unì miurà l servisc ala jënt pra la stazion de Pruca” nsci i assessëures Mussner y Widmann. De chësc à nce rengrazià i ambolc da Laion y Pruca Engelbert Grünberger y Norbert Merler.

Per na segonda plaza dai auti sun la pert a nord vëniel bele laurà. Cun chësc lëur saral aldò di doi assessëures provinziei de ndut feter 100 lueges per chëi che tol la ferata. “La lerch per lascé l auto ie una dla cundizions plu mpurtantes acioche truepes tole nce la ferata” nsci Mussner y Widmann.

I aministradëures provinziei à sotscrì n’acurdanza cun la sozietà dla ferata RFI y i chemuns da Laion y Pruca acioche l’aministrazions publiches posse fé y mantenì la strutures sun puscion dla ferata. La sozietà RFI ie cumpetënta per i pruvedimënc contra la fuera pra la scines, ntan che la Provinzia se cruzia dl rundel, dla fermeda dla curieres y dla streda che passa pra la stazion. L Chemun de Laion se à sëurantëut di parëies contra la fuera da pert dl luech y l Chemun de Pruca i passajes da jì a pe y de fé crëscer ierba sëura la tunel dla ferata.

as

Galaria dales fotografies