Atualità
Berstot davierta a Urtijëi
USP – La scola prufesciunela per l artejanat artistich de Gherdëina à scumëncià l ann de scola cun na berstot davierta. Sculeies da plu pertes dla Talia y da oradecà à pudù se ancunté y se baraté sperienzes ntan che l ie unì mparà te berstot.
Feter 70 sculeies dala Talia, dal’Austria, dala Germania y dala Francia à fat pea l’ena de berstot davierta tla sënta nueva dla scola prufesciunela a Urtijëi. 45 de chisc ie sculeies che mpera a ziplé. I duc sculeies à giapà la puscibltà de mparé a cunëscer de plu pertes dl artejanat artistich, nsci iel unì pità de ziplé, modelé, dessenië, turné y chëst ann nce de lauré la scipa. Cun la berstot davierta ie l ann de scola uni scumencià cun truep nseniamënt pratich, propi sciche l ie la idea de chësta scola. “La scola prufesciunela porta inant la tradizion dl artejanat artistich de Gherdëina y ne uel nia me la mantenì ma nce la dé inant tenian cont di bujëns dl tëmp”, nsci l diretëur Julius Senoner. Cun la strutura nueva, tl zënter scolastich, an śën nce a desposizion la lerch che va debujën.
as
