Atualità
Jonta provinziela per la garejedes de copa dl mond
USP- La Jonta provinziela de Bulsan à te si senteda de (ncuei) lunesc 22 de setëmber fat ora de ulëi fé na mediazion danter l presidënt dla FISI Morzenti y i cumiteies che mët a jì la garejedes de copa dl mond de schi te Gherdëina y tla Val Badia. Tla senteda iel danterauter nce unì tratà l sustëni per l aiut cun l joler, l cuntrol dla lores, paiamënc per nsenianc y la ndenità per jënt che sta ora dla Talia y vën a lité.
La garejedes de copa dl mond de schi à massa na gran mpurtanza per l Südtirol y perchël ne pudons nia les pierder. Cun chësta argumentazion à la Jonta provinziela de Bulsan fat ora de ulëi rujené cun la pertes ntressedes per abiné na soluzion. L presidënt dla Federazion taliana FISI se damanda na pert dl davani ora de dërc de televijion che i doi cumiteies de urganisazion ne ie nia desposć a paië. Davia che n ie nia ruvei a una, manacia śën l Südtirol de pierder la garejedes per auter ann. La Jonta provinziela uel fé da mediatëur per cialé che la garejedes resta nce tl daunì. L presidënt dla provinzia à dit de nia ulëi se lascé recaté y de ulëi sustenì i cumiteies dla Val Badia y de Gherdëina.
Ndenità per furné a lité
La ndenità a zitadins che à la residënza ora dla Talia y che vën cësa a lité ie unida auzeda. Chësta regulamentazion dl 1983 ne fova mei plu unida mudeda y śën l an adateda al’nflazion arjunjan passa mo n tant dla ndenità che ie stata nchin a śën. L dërt de giapé chisc scioldi à feter 12.000 persones dl Südtirol che ie jites a sté ora dla Talia.
Cuntrol dla Lores
La lores unirà cuntroledes tres n trasmitënt sun dut l raion regiunel. La culaburazion danter la doi provinzies de Bulsan y de Trënt vëija dant de ti mëter a uni lores n trasmitët per savëi sce les ruva daujin a luesc da paur y per studië i muvimënc. A chësta maniera uelen schivé che la lores feje dann y zera la biesces, y chësc sun n majer raion.
Paiamënt a nsenianc amalei
La Jonta provinziela ne à nia l mesun de paië ora l paiamënt plën per i prim diesc dis de nsenianc amalei. Autramënter che tla provinzia de Trënt, ie i nsenianc tl Südtirol regulamentei sciche dependënc dl stat. Per chësta rejon ne à la Jonta nia pudù adaté la regulamentazion dl paiamënt n malatia cun na regula speziela.
Prim aiut cun l joler
Per l servisc de prim aiut cun l joler à la Jonta provinziela dat pro l custimënt de 5,8 milion de Euro per l ann 2007. Cun na cumpëida de 2.870, iel stat 16% plu ntervënc permez al ann dant. L Aiut Alpin Dolomites ie nchinamei julà 30% plu ntervënc. La Provinzia de Bulsan sustën l servisc cun 2,6 milon de Euro.
Aministrazion dl’autostreda
L daunì dl’aministrazion dl’autostreda depënd dala ulentà l presidënt sun ncëria provisoria y dl cunsëi. Ncuei à l presdiënt da dant Silvano Grisenti sëurandat la ncëira a si vize Benedikt Gramm. Aldò de na lege nueva dëssa la cumpëida tl cunsëi de aministrazion unì smendrida. Śën se tratela sce l unirà me metù n presidënt nuef o sce l vën fat dut l cunsëi da nuef, cun manco cumëmbri. La decijion ti spieta al cunsëi da śën.
as
