Atualità
Cunsëi de direzion nuef per la scolines ladines
USP – La jonta provinziela de Bulsan à te si senteda de (ncuei) lunesc 22 de setëmber dat pro i reprejentanc dla comuniteies raioneles y esperc educatives tl cunsëi de direzion per la scolines ladines.
L cunsëi de direzion à cumpetënza de dé cunsëies y fé prupostes per l’atività dla scolines. I argumënc prinzipei ie daniëura i orars per l servisc dla scolina, l atività didatica y nce proiec che vën nviei via.
Cun duc a una à la Jonta provinziela dat pro Elisabeth Baur Großrubatscher y Hildegard Tasser Zingerle sciche reprejentantes dla comuniteies raioneles Salten Scilier y chëla de Puster. Dl ciamp dl’educazion iel unì numinà cater esperc. Chisc ie la duturëssa per mëndri, Elisabeth Salcher Delago, la psicologa Margit Prucker, la pedagoga soziela Esther Rungger y l espert de scienzes dl’educazion Theodor Rifesser.
Tla proscima enes uniral mo leprò reprejentanc di genitores, dla maestres y dla culaburadësses. La presidënza dl cunsëi sëurantulerà aldò dl regulamënt, la diretëura dla scolines ladines Edith Ploner.
Aldò dla normes esecutives dla lege nueva, data pro de lugio de chësc ann uniral regulamentà da nuef la cumpetënzes y desposizions dla scolines.
L cunsëi de direzion nuef per la scolines ladines se ancunterà de nuvëmber per la prima senteda ufiziela. Si ncëira dura trëi ani nchin dl 2011.as
