Atualità
Ai 4 de utober portes daviertes di sciaudamënc a distanza
USP – L sciaudamënt di cuatieres ne vën nia for fat n cësa. For de plu luesc dl Südtirol à mplanc de sciaudamënt a distanza ulache l vën tizà massa biologica. Chi che ulëssa se fé n cheder da ula che vën plu avisa chësc sciaudamënt a distanza y co che l vën njenià, possa n sada ai 4 de utober jì a ti cialé à un di 33 mplanc tla Provinzia de Bulsan.
Sun scumenciadiva dl dipartimënt provinziel per l ambient y energia gëura n sada ai 4 de utober i mplanc de sciaudamënt a distanza si portes. Duc i nteressei possa mparé a cunëscer la tecniches tres chëles che for plu cuatieres possa unì sciaudei a distanza a na maniera da stravardé l ambient.
I vantajes de sciaudé cun massa biologica vëij l assessëur al ambient te chëla che la ne ie nia me saurida na nuzé, ma nce a bon priesc, fata tlo da nëus zënza vester dependënc y cun de bona pruspetives per l daunì. Te n ann vëniel tres l sciaudamënt a distanza cun massa biologica sparanià 45 milions de litri de gasuele y tl medem mumënt nce 125.000 tones de anidrida de carbonium.
N l di dla portes daviertes de chisc mplanc de sciaudamënt uniral nce giaurì doi mplanc nueves. Chisc ie unì fai a Terlan y a Lijun (Luson).
as
