Atualità
1,12 milion de Euro per la cultura ladina
USP – L Guviern provinziel de Bulsan à dat pro la terza pert di cuntribuc da chëst ann per sustenì la cultura ladina. Te chëst capitul iel scioldi per ativiteies cultureles y nvestimënc de lies cultureles. Chëst ann à l Assessorat Ladin de ndut bel pudù sustenì lies, artisc’ y aministrazions publiches cun 1.121.600 Euro.
Cun la terza pert di cuntribuc per la cultura ladina, iel unì spartì su feter duc i scioldi a desposizion per l ann 2008. Tla senteda de chëst ena à l Guviern provinziel dat pro 36.400 Euro. Tl capitul per ativiteies cultureles à i assessëures provinziei dat pro n cuntribut per la lingia de cunzerc de mujiga tlassica Badiamusica y per nvestimënc de 9 lies. Gran pert de chësta lies se da ju tl ciamp dla mujiga, l se trata de cater cores, trëi mujighes y na grupa da bal che giapa n cuntribut per trohtes y per strumënc.
I mesuns finanziei per judé a mantenì la cultura ladina vën metui a desposizion dala Provinzia de Bulsan aldò dl pruporz. Chëst ann iel de ndut 1.200.000 Euro a desposizion che vën spartì su aldò dla dumandes che vën mandedes ite. La Cunsulta culturela ladina, na cumiscion de cinch persones valuteia aldò dl valor culturel la mesura dl cuntribut. La pruposta vën pona purteda dant dal assessëur ladin al Guviern Provinziel, che da pro la somes.
as
