Atualità
Veles provinzieles: 80,1 percënt ie jic a lité, 2,3 de manco
USP- De ndut ie 313.867 persones jites a lité l Cunsëi Provinziel nuef, chësc ie l 80,1 percënt di 387.796 cherdei a lité. Permez al’ultima veles provinzieles tl ann 2003 ie stat 2,3 percënt de manco che ie jic a lité. Te Gherdëina à lità l 82,5%, tla Val Badia iesen stai plu lezitënc arjunjan l 83,5%.
Nchin la 11 danmesdì ova lità 23,2% di litadëures, dala cinch domesdì fova bele 55,7% jic ala urnes. Canche l ie unì stlut la sezions de vela, dala diesc da sëira à lità de ndut 313.867 litadëures, che ie l 80,1 percënt di litadëures de duta la Provinzia de Bulsan. Cun chësta zifres n cont de jì a lité, va inant l trend di ultimi ani. Tl ann 1998 ova mo lità 85,7 percënt di litadëures, tl 2003 ne n fovel mo 82,7 percënt.
Dla doi valedes ladines iel unì lità deplù che la media provinziela. Tla Val Badia iel stat l 83,5 percënt di 8.103 litadëures che ie jic a lité, te Gherdëina iel stat 82,5 percënt sun 6.967 persones. Cumpedan adum i ot chemuns dla doi valedes (zënza la frazions ladines de Ciastel) iel stat 83,1 percënt che ie jic a lité, chësc ie 3 ponc de plu permez a duta la Provinzia de Bulsan.
I plu lezitënc de lité ie stai i litadëures de La Val, tlo iel unì cumpedà l 89,3%. Bele dan cin ani ova La Val abù la majer afluënza di chemuns ladins dla Provinzia, dl 2003 ova nchinamei lità l 90,8%. La mëndra perzentuela di litadëures ie chëst iede jita a lité tl chemun de Corvara cun 79,6%. Paredlan chësta zifres cun la veles dl ultim Cunsëi provinziel vën a lum che te duc i ot chemuns iel stat de manco che ie jic a lité. A La Val iel me stat 1,5 percënt de manco, a Badia nchinamei l 5,6 percënt de manco.
Nce sce l ie stat de manco che ie jic a lité à l Presidënt dla Provinzia Luis Durnwalder mustrà sudesfazion: “L ie stat n pue’ de manco che à lità, permez a d’autra regions ie l afluënza purempò stata dassënn bona”, nsci l Presidënt. La bona cumpëida de chëi che ie jic a lité testemunieia respunsabltà da pert di litadëures dl Südtirol n cont de si dërc democratics. “Me chi che va lité, porta nce pea la decijions”, sorissea Durnwalder, “y chësc dërt de purté pea la decijions ne se lascia chëi dla Provinzia de Bulsan nia tò.”
La zifres n cont de tanc che ie jic a lité ie publichedes sota www.provinz.bz.it/wahlen sun la plates internet dla Provinzia.
|
| 2008 | 2003 | */- |
| Urtijëi | 81,3 | 83,3 | -2,0 |
| S.Cristina | 83,4 | 85,3 | -1,9 |
| Sëlva | 82,7 | 86,7 | -4,0 |
|
|
|
|
|
| Badia | 82,2 | 87,8 | -5,6 |
| Corvara | 79,6 | 85,1 | -5,5 |
| Mareo | 83,0 | 86,3 | -3,3 |
| S.Martin | 83,6 | 87,7 | -4,1 |
| La Val | 89,3 | 90,8 | -1,5 |
as
