Atualità
Cuncors de ideies contra desgrazies nchin ai 14 de nuvëmber
USP – Furnà massa debota, massa ala lesiera o ti la massa vagheda – sun nosta stredes iel mo for massa desgrazies. Tl cheder dla campania contra la desgrazies sun streda chier l Assessorat ala stredes tres n cuncors ideies nueves per plu segurëza sun streda. La ideies possa unì dates ju da ncuei (3 de nuvëmber) nchin ai 14 de nuvëmber. Da vëncer iel nchin a 1.000 Euro.
La populazion ie nvieda de se dé ju ativamënter cun la campania de sensibilisazion y de purté ideies per pruvedimënc contra la desgrazies sun streda, spiega l assessëur ala stredes Florian Mussner l fin dl cuncors che ie metù a jì deberieda cun l servisc de assegurazion Raiffeisen. “Uni un possa fé pea y nstës fé zeche per la segurëza sun streda” sorissea Mussner. L vën per ejëmpl damandà ideies per i placac y julantins, ideies co che i sculeies ruve plu segures a scola, mesures de utl tl frabiché stredes, prupostes per azions de sensibilisazion o spoc tl radio y televijion.
Dal 2005, canche ie mueta la campania contra la desgrazies cun l motor “No Credit” ie la cumpëida dla desgrazies cun morc tl Südtirol caleda de n terzo. “Cun l cuncors ulons śën che la populazion se rënde for plu cont dla mpurtanza dl bon cumpurtamënt sun streda y dl furné cun cuscienza”, dij l assessëur Mussner.
La ideies y prupostes mandedes ite dai jëuni nchin a 19 ani y da granc o urganisazions, unirà valutedes a pert dala giuria. I criteries de valutazion ie la fazion n cont de sensibilisazion, tant che l toca i fins, tan bën che l ie da capì y da pudëi realisé. Per la diesc miëura ideies iel unì njenià pesć da 250 nchin a 1000 Euro.
L material laurà ora per ladin, talian o tudësch, possa unì dat ju da ncuei, 3 de nuvëmber nchin ai 14 de nuvëmber tl dipartimënt per i lëures publics dla Provinzia de Bulsan, tla repartizion Servisc per la stredes, streda Crispi 2 a Bulsan. Da junté iel mo la dizion “No Credit – cuncors de ideies per la segurëza sun streda”. Ideies y prupostes possen nce dé ju de persona, tla repartizion per l Servisc dla stredes, ufize de protocol nr 104, tla cësa provinziela 2 a Bulsan. I orars de giaurida ie da lunesc a vënderdi, dala 9-12 y 14.30-16.30.
I lëures anjeniei per l cuncors muessa vester te n pachetl zënza dé sëura l inuem, ma me cun la zifra de recunescimënt. La spiegazion muessa unì data ju te na cuvierta a pert. Nfurmazions plu avisa giaten tl diparimënt per i lëures publics, al numer de telefonn 0471 412337 o 0471 412338. Velch de plu n cont dla campania „No credit“ y dl cuncors de ideies ie nce unì publicà sota www.nocredit.it tl internet.
as
