Atualità
Liber per mëndri te trëi rujenedes
USP – L liber per mëndri dal titul "Miteinander - Insieme - Deboriada" ie unì prejentà ncuei (13 de nuvëmber) a Bulsan. L liber cun doi CD dëssa ti judé a se giaurì y se ntënder miec danter la grupes de rujeneda da pitl insù. L material didatich per mëndri nchin a diesc ani ie unì dat ora tres na culaburazion di trëi Istituc Pedagogics.
Mëndri ne à nia pregiudizies de vieres de chëi che i ne cunësc nia y fulestieres de autra rujenedes y cultures. Ëi ti va ancontra a duc cie che ie nuef cun gran bunder y ueia de mparé a cunëscer. Sun chësta basa à i istituc pedagogics dla trëi rujenedes, nvià via l proiet dl liber cun CD per avëi n mesun de cuntat danter la trëi cultures tl Südtirol.
“La maniera de purté ite l cunzet de rujeneda y cultura tla furmazion à na gran fazion sun la cunvivënza soziela y nsci nce sun l daunì dla cumenanza tl Südtirol” à detlarà i editëures. L ie mpurtant dé inant ai mendri la sensazion che vivon te n raion cun stories, tradizions y cultures defrëntes. “Chësta pluralità dëssa unì tëuta su sciche na richëza y per l daunì vester na fundamënta per na posizion davierta de viers de autra cultures”, nsci l fin di Istituc Pedagogics.
Culaburadëures di istituc y dla scolines à cris adum manieres adatedes per mëndri per ruvé permez al autra rujenedes. L ie unì abinà adum stories, cianties, rimes, juesc y poejies. Dut chësc ie unì publicà tl liber cun CS "Miteinander - Insieme - Deboriada".
Per la pert ladina dla publicazion à laurà pea la dirijënta dla Scolina de Sëlva Frida Ploner y la diretëura dla scolines Edith Ploner. La cianties y la stories per ladin sun la CD ie unides purtedes dant da Silvia Mussner y Gertrud Pitscheider. La traduzions ladines à fat Daria Valentin y Milva Mussner. Pra la prejentazion ncuei, tl teater Cristallo a Bulsan à Theodor Rifesser reprejentà l Istitut Pedagogich Ladin. Per la scola ladina ie unì adalerch l ntendënt Roland Verra.
La publicazion nueva unirà śën spartida ora tla scolines y tla scoles elementeres dla Provinzia de Bulsan.
as
