Atualità
Refudam nia tl parch naturel Puez-Odles, ma mpo da cundané
USP – La deponia dal refudam che i Carabinieri à chisc dis abinà sun Secëda ne ie nia tl Parch naturel Puez-Odles. Chësc vëniel sorissà tl Ufize provinziel per i parcs naturei. L giavé ite refudam ie purempò da cundané, vëniel tenì prejënt tl ufize provinziel.
Ti nutizieres che i Carabinieri de Urtijëi à abinà refudam giavà ite iel nce unì dit che la deponia fossa stata tl raion dl Parch naturel Puez-Odles. Chësc ne ie nia vëira: „La deponia dal refudam a fosch, ie dedora dal parch naturel“ nsci vëniel stlarì tl Ufize provinziel per i parcs naturei. Nce sce l refudam ne ie nia unì metù ju te raion sota defendura, iel mpomo da cundané dassënn. „Sce tl Südtirol iel la puscibltà de fé atività cumerziela te raions cun tan na bela cuntreda, pona dëssel nce unì respetà la natura y sambënzënza muessa l refudam unì menà demez“ chësc vën metù a cuer da pert dl Ufize provinziel per i parcs naturei.
as
