Atualità
Da doi ani telefonn per genitores
USP - Feter 2.000 persones se à da dezëmber 2006 nchin a ncuei nuzà dl telefonn per genitores. De plu umans che no peresc d’unì età à cherdà su. “Chësc servisc de cunsulënza che ne ie nia da paië, vën pità per ti dé riesc n aiut n cont de tré su mutons” à ncuei (28 nuvëmber) dit l’assessëura Sabina Kasslatter Mur.
Te doi ani iel stat 1866 persones che à damandà n cunsëi tres l telefonn per genitores: 61 percënt à damandà na cunsulënza, 19 percënt nfurmazions cuncretes. I argumënc sun chëi che l ie unì damandà ie majera pert l tré su mutons (50 percënt), problems de droghes y alcol (16 percënt) y cuestions de scola (8 percënt). La majera pert di caji (78 percënt) iel stat ëiles che à cherdà su. Chëstes ie la zifres prinzipeles che ie unides prejentedes do doi ani de telefonn. L servisc ie chëst ann unì finanzià cun 192.000 Euro dala Provinzia.
“Tré su mutons ie rie, l porta melsegurëza” à dit l’assessëura Kasslatter Mur ncuei a Bulsan. Tl svilup dla cumenanza, l se pierder dla tradizion, la prescion de purté prestazions y la nfluenza di media, vëij l’assessëura la rejons dla dificulteies. L servisc dl telefonn per genitores ie unì sëurantëut dal servisc de cunsulënza per copies y educazion, deberieda cun l cunsorz soziel Germoglio/Sonnenschein. Undesc psicologhes à respundù al telefonn y ala é-mails te duta la rujenedes provinzieles.
L telefonn per genitores à l numer 800 892 829 y ie a desposizion da lunesc a sada dala 10 ala 12, da lunesc a vënderdi nce da sëira, dala 17.30 nchin la 20.30. E-mail possa unì mandedes a beratung@elterntelefon.it .
as
