Atualità
Jonta provinziela dl 26 de jené
USP – L pont de majera mpurtanza dla senteda dla Jonta provinziela ai 26 de jené, ie stat co spartì su l bilanz de 5,4 Miliardes. La dezijion definitiva muessa mo unì tëuta. N cont dla reforma dla scoles ie l Guviern provinziel sfurzà a sëurantò la mudazions n cont dla valutazions di sculeies. La veles dl Chemun de La Ila unirà tenides ai 3 de mei 2009.
Veles de Chemun a La Ila
La Jonta provinziela à metù l 3 de mei 2009 sciche di de vela per i chemuns che muessa lité da nuef l Cunsëi. N la prima dumënia de mei uniral tenì veles de chemun a La Ila, Mals, Plaus y Brenner.
Bilanz provinziel de 5,4 miliardes da spartì
Aldò dl presidënt Durnwalder arjunjerà l bilanz dla Provinzia per l ann 2009, 5,4 miliardes. Da Roma mancel mo feter na miliarda de Euro. Chësc cumporta che na pert de chisc scioldi, ntëur 600 milion de Euro ne possa mo nia unì juntei tl bilanz ajache n muessa te chësc cajo respeté l pat de satbilità y ne possa perchël nia i dé ora. La Provinzia muessa smëndrì la spëises de 5% y la nvestizions de 2% per respeté l pat de stabilità. „Dal’autra part vala de nvië via programs a pert per dé forza al’economia y ala families“ dij Drunwalder. N cont de personal, sanità, trasport publich y nrescida aumënta dessegur i custimënc. De manco puderà unì dant ora per l’economia y i lëures publics. Tla proscima enes uniral tëut na dezijion co spartì su l bilanz provinziel da chëst ann.
Lege finanziera
Nchin ai 27 de jené possa i assessëures purté prupostes n cont dla lege finanziera da chëst ann. Nchinamo ie unì purtà dant 25 articuli.
Cumité nuef per l frabiché cuatieres
I cumëmbri dl cumité nuef per frabiché cuatieres ie deberieda cun Luis Durnwalder, i assessëures Hans Berger, Michl Laimer, Richard Theiner y Christian Tommasini che ie nce presidënt. Chësc cumité tol dezijions definitives n cont dl frabiché cuatieres. Da nuef iel che l sëurantol nce duvieres dla cumiscion de cuntrol che fova unida tëuta demez. De cumpetënza ie nscila la prutestes contra delibres dla cumiscion per sëurandé cuatieres soziei dl IPES, contra l dé ora cuntribuc per cuatieres o contra pruvedimënc dl presidënt dl istitut per cuatieres soziei IPES.
Reforma dla scola
La Provinzia de Bulsan ie sfurzeda a sëurantò dal Stat l sistem de valutazion di sculeies acioche l atestat de scola vënie nce recunesciù te d’autra regions. Tla scola elementera resterà inant la valutazion generela. L livel arjont dai sculeies unirà valutà cun zifres. Dl cumpurtamënt di sculeies dl’elementera uniral tenì cont tla valutazion generela.
Tla scola mesana dëssa l livel arjont dai sculeies unì valutà cun zifres. Per passé tla proscima tlas muessa i sculeies avëi almanco n 6 te duta la materies. Da nuef iel tlo la valutazion dl cumpurtamënt che unirà ënghe fata cun l sistem a zifres. „Tla scoles mesanes giaperà i sculeies dl Südtirol ala fin de chësc ann de scola nce na valutazion scrita cun paroles“ spiega Durnwalder. La valutazion generela ie de mpurtanza per dé inant ai genitores la nfurmazions mpurtantes n cont dl svilup dla persunalità dl sculé. „Cun n cinch de cumpurtamënt, muessen fé mo n iede la tlas“ nsci Drunwalder. Chësc ie me l cajo sce ntan l ann de scola à l sculé messù sté a cësa per de ndut 15 dis.
Davani per l frabiché alesirà
La Jonta provinziela à auzà la sëides dl davani y dla pert liedia de 4,3 percënt. La sëida per la categuries de davani mesan, l cuinto livel, ie unì metù da nuef. Aldò dl presidënt dla Provinzia iel tlo udù dant n davani netto danter 38.500 y 50.000 Euro.
Cumiscion di 29
La Jonta à metù su na cumiscion nueva che tol dezijions sce l possa unì spustà cubatura de n luech da paur o sce l possa unì spustà te raions udui dant sciche vërt agricul. La cumiscion ie metuda adum da reprejentanc dla repartizions per lëur da paur, urbanistica, natura y cuntreda, n agronom y l ambolt dl chemun nteressà. Chësta cumiscion di 29 ie unida metuda su per defënder l vërt agricul y per schivé speculazions à dit Drunwalder.
100 ucajions per fé pratica
A sculeies, studënc y academics jëuni ti dà la Provinzia nce chëst ann ucajion de fé n practicum tl’aministrazion provinziela o nce tla sëntes destachedes a Roma y Brüssel. Aldò dl livel de scola vëniel dat na bona man danter 30 y 50 Euro brutto al di. Nteressei possa fé dumanda tl Ufize provinziel per tò su personal a Bulsan nchin ala fin de fauré.
Cumiscion nueva per l ejam da ciacia
Cun l prim de merz 2009 saral na cumiscion nueva per l ejam da iagher. La Jonta provinziela à metù Heinrich Erhard presidënt y mplu nce Desiderata Mair, Alessandro Eccher y Ernst Riffesser per la grupa de rujeneda ladina. Leprò iel nce i esperc de tieres salveres Alfons Heidegger y Heinrich Holzer.
usp
