Atualità
Pericul de levines sun i jëufs ntëur l Sela
USP – Per pericul de levines resta i jëufs ntëur l Sela sarei. Do che n à bele stlupetà per fé unì ju la nëif valuterà la cumiscions dla levines ncuei co jì inant ntan i proscimi dis. “L vën fat dut cie che se lascia per garantì segurëza a chëi che ie sun streda, ma canche l ie tan truepa nëif sciche sën, messons nce saré i jëufs” spiega l assessëur provinziel Florian Mussner.
Ntan l fin dl’ena al sun i jëufs ntëur l Sela inò fat n meter de nëif frëscia. A 2000 metri de autëza iel nce scialdi da vënt a na maniera che la chëutra de nëif ie a luesc nce dassënn buieda. Te de plu lueges iel feter 180 cm de nëif che manacia de sbriscé ju sun la streda di jëufs. N dumënia (8 fauré) à l Servisc provinziel per la streda bele lascià stlupeté ju levines sun l Jëuf de Sela. Da mesdì fova suinsom l Jëuf de Sela bel unida ju na levina. I Judacrëp y la grupes di Destudafuech de Gherdëina y de Fascia ie riesc unides sun l post per crì cun sondes y l aiut de trëi joleri. Per fertuna ne fovel deguni sotite. La levina ie unida ju danter la cëses suninsom l jëuf de Sela y la cësa Capadozzi a 2.200 metri de autëza.
Sun l luech dla levina ie nce unit adalerch l assessëur Florian Mussner: “La nëif ie de gran valor per l’atività turistica, ma te chësc mumënt cumporta la truepa nëif nce pericul.” L Servisc provinziel per la stredes lëura cun diesc persones y l sustëni di Destudafuech ulenteres per la segurëza sun streda. “On jënt che mënt si vita n pericul per la segurëza di autri, y de chësc i rengrazi a inuem dl Guviern provinziel” nsci l assessëur Mussner.
L majer pericul de levines ie a mumënt sota Mur Frëit y sun la pert de Gherdëina dl Jëuf de Sela. Ncuei domesdì se anconta la cumiscion per la levines per valuté plu avisa la situazion y tò na dezijion n cont tenì la streda śareda y sce l se lascia mo stlupeté levines.
Ntant resta śarei sibe i cater jëufs ntëur l Sela, l Frea, Ciaulunch (10.00-17.00) y l Pordoi, y nce l Valparora y l Fauzare (Falzarego).
as
