Atualità
Truepa prupostes per la zircunvalazion de Sëlva
USP – D’autonn ova l Assessorat provinziel per stredes scrit ora n cuncors a livel europeich per la proietazion dla streda de zircunvalazion de Sëlva. Bën 25 prupostes ie sën unides mandedes ite. Chësta bela cumpëida de studi ie de gran valor per pudëi crì ora la miëura soluzion per Sëlva.
“Sce on giapà ite tan truepa ideies per la zircunvalazion de Sëlva, possa la cumiscion crì ora chël studi che se adatea veramënter l miec per Sëlva” se ncunforta l assessëur Florian Mussner. Chësc lëur, che possa custé nchin a 32 milion de Euro, dëssa vester la soluzion al gran muvimënt no me tres l luech de Sëlva, ma tenian cont nce de duta la valeda y di jëufs. Tla valutazion dla prupostes uniral sëuraprò ala carateristiches tecniches nce dat pëis al respet y senisblità per ambiënt y cuntreda. La streda de zircunvalazion de Sëlva dëssa avëi na lunghëza de feter 3,5 chilometri.
I proscimi vares ie śën chël de numiné na cumiscion de set persones che fajerà n iede na prima valutazion danora. De auril iel pona udù dant de finé via la valutazion plu avisa y de fé al savëi ciun proiet che à venciù l cuncors. Sëurapo al pest de 25.000 Euro per l miëur studi, giaperà nce l segondo y terzo n pest.
Da ula che ie unides mandedes ite la prupostes savran permò canche la cumiscion à finà si lëur de valutazion. I 25 studi resta nchin a ntlëuta anunimesas
