Atualità
Mussner sun la Mendula: i lëures va inant (cun audio)
USP – I lëures per rumé la nëif y rumé su la streda dla Mendula possa aldò dl assessëur provinziel Florian Mussner jì inant. Chësc ie unì dit ncuei (13 fauré) pra n sëuraluech. La streda dëssa unì giaurida pernan che la va almanco per n valguna ëures, à dit l assessëur.
Deberieda cun i respunsabli per l Servisc provinziel per la stredes y dla firma spezialiseda “Karl Nocker” de Urtijëi à l assessëur Florian Mussner de persona ulù se fé n cheder dla situazion. Per l mumënt ne iel nia pericul de levines. N lunesc 15 de fauré uniral perchël scumencià a rumé la nëif y l material che ie sun streda. Ntan chisc lëures tën l Servisc provinziel dla stredes l cuntat cun geologhes y la cumiscion de levines per avëi l cuntrol dla situazion.
La rëies y i parëies acioche ne vënie nia ju sasc ie majera pert roc y plënns, perchël ne ie l pericul sun streda mo nia passà. Sce l tëmp juda pea uniral l’ena che vën nce scumencià a rumé ora la rëies y rumé ju sasc y lëns melsegures.
“La va de lauré canche l tëmp lascià pro, ma zënza sëuraudëi l pericul per i lauranc” à sorissà l assessëur Mussner. “Cialon de giaurì la streda pernan che la va, amaca per n valgun’eura per chëi che muess jì a lauré”.
La prima gran nëives de dezëmber ova sun na lunghëza de n chilometer rot la rëies per i sasc. Per via dl pericul à pona unì messé saré la streda.
Da permò à la cumiscion tecnica dla Provinzia dat pro l proiet per n tunel tl raion n cuestion. “La streda dla Mendula à gran priorità y tlo uniral fat n tunel de feter 430 metri per la segurëza de chëi che furnea da tlo su” spiega l assessëur Mussner.
as
