Atualità
Durnwalder a Togo: sies proiec purtei inant
USP - Do Benin, ie Togo la segonda stazion dl viac dl presidënt dla Provinzia Luis Drunwalder tl’Africa. Te chësc raion à la Provinzia y la Region sustenì de plu proiec de culaburazion per l svilup: aiut per vierces, costruzion de na scola prufesciunela y n zënter scolastich per feter 250 mëndri y jëuni.
Da n sada nchin nsëira ie la pitla delegazion cun l presidënt Drunwalder stata a Togo. Tlo à la Provinzia spendù ite 10.000 Euro te doi proiec, la Region à paià 72.500 Euro per cater proiec de svilup.
Durnwalder à vijità la strutura a Togoville che pieta servisc a 75 vierces y persones cun majer dificulteies de vista. Cun l aiut dal Südtirol y la coordinazion dla grupa miscionera de Maran iel te chësc raion unì zidlà bestiam y njenià la massaria aldò, massaria per l dutor dal bestiam y na stala. “Cun l zidlé purciei à la cësa per i vierces na forma de davani che ti va a bën di sculeies” spiega Durnwalder. Mplu iel a chësta maniera nce stat mesun miuré la spëisa te cësa.
A Lomè, tla capitela de Togo à la delegazion pudù vijité n zënter de Scola prufesciunela sustenì dala Region Trentin Südtirol y menà dala lia “Amici nel Mondo”. Tlo vëniel tenì cursc de computer y nsenià ju mecanicri y eletricri. “Nce cun nosc aiut iel unì anjenià la fundamënta per ti dé a feter 200 jëuni perspetives per si daunì” dij l Presidënt dla Provinzia.
A feter 250 mëndri y jëuni ti vëniel pità furmazion te n zënter scolastich che ie unì fat su cun aiut dla Provinzia te n luech dedora da Lomè. “L frabicat dla scolina, scola elementera y scola mesana ie veramënter stlet y true’ massa pitl per duc i sculeies” spiega Drunwalder. Cun n prim cuntribut provinziel an śën pudù scumencé a ressané ot tlasses y ne n fé mo trëi leprò. Nce material didatich iel stat mesun cumpré cun aiut dl Südtirol. La coordinazion sun l post de chësc proiet vën fata da n sculé da dant che ie nce stat tl Südtirol a fé na scola auta tecnica.
Do l’ancunteda cun l minister per aiuc de svilup ie la delegazion nsëira mueta de viers de Ghana, che sarà l’ultima stazion dl viac de diesc dis tl’Africa.
as
