Atualità
Jonta provinziela dl 23 de merz
USP – La Jonta provinziela de Bulsan à ncuei (23 merz) anjenià la lege finanziaria per l ann 2009. Per l Südtirol uniral te curt tëmp njenià na lege n cont dl’aumënt de cubatura pra la cëses privates. Chisc ie stai ponc prinzipei che l presidënt Drunwalder à prejentà do la senteda dla Jonta provinziela.
Pruvedimënc contra la crisa
Tla Provinzia de Bulsan iel bele feter 2.000 dependënc n cassa ntegrazion y giapa tl mo 880 Euro lordi al mëns. Aldò dla lege statela reveda chësc me i dependënc de firmes cun passa 15 lauranc. Tl Südtirol iel feter 1.000 persones che à bele perdù l lëur. La Jonta provinziela à njenià na pruposta co che n pudëssa cun 21 milion de Euro judé inant te chisc caji per i proscimi 8 mënsc, spartian su l custimënt cun 70% dal Stat y 30% dala Provinzia. Śën depëndel sce chësta pruposta vën azeteda a Roma.
Duc i pruvedimënc contra la cirsa deberieda dëssa unì dai pro tla proscima senteda dla Jonta provinziela. Te chësc pachetl dëssel aldò de Durnwalder unì ntegra l program de nvestizions, i pruvedimënc per stizé la cooperatives de garanzia, l smëndrì de burocarazia, i aiuc per firmes y dependënc che manacia de pierder l lëur.
Lege finanziaria
Te feter 50 caji iel debujën de adaté leges provinzieles. Chësta mudazions à la Jonta ncuei udù dant te si pruposta de lege finanziaria che muessa unì data pro te Cunsëi provinziel. Duman merdi uniral tratà cun i reprejentanc dla grupes politiches per ruvé a una co purté inant la leges che reverda l bilanz provinziel da chëst ann. L Presidënt Drunwalder à te chësta ucajion fat al savëi che davia che l bilanz unirà permò dat pro per la fin de auril ne uniral chëst ann nia fat bilanz de assestamënt per ntegré variazions ntan l ann.
Riesc na lege urbanistica
Aumenté la cubatura dla cëses (cun cuatieres) nchin al 40%, sciche l vën mpermetù a livel naziunel, ne sarà tla Provinzia de Bulsan nia puscibl. “Chësta lege ulëssa di mëter a post chi che à frabicà ora de lizënza” à dit Drunwalder. “Tlo da nëus fossa chësc na catastrofa dal pont de uduta urbanistich”. La Jonta à ncuei nciarià l assessëur de cumpetënza che l dëssa lauré ora na pruposta de lege che lascia pro de plu cubatura sce l vën fat n ressanamënt per sparanië energia. L’idea ie tlo de lascé adurvé l sotët per fé ora l cuatier.
Plaza di ciavei a Maran
Per salvé la strutura dla plaza dala garejedes di ciavei a Maran iel debujën de ressanamënc. L Presidënt dla Provinzia à dit che l spera che l Stat y la Federazion Unire tënie de dé 10 milion de Euro sciche mpermetù. L Chemun y la Provinzia messessa sëuraprò paië 15 milion de Euro per no messei śaré la strutura. La Jonta provinziela à fat ora de ulëi ruvé a una cun l Chemun ti vendan grunc che la Provinzia ova cumprà ju dala Ferata per pudëi nsci finanzië la strutura per la garejedes de ciavei. La gestion dëssa aldò de Durnwalder unì metuda a jì n culaburazion danter aministrazion publica y privata per vester plu daujin ala pratica y cun manco custimënt. A Maran dëssel nce unì fat n zënter per i ciavei Haflinger per chël che reverda la pert sportiva y la pert dl zidlé ciavei. De utober 2009 uniral a Maran metù a jì n campionat de Europa per i ciavei Haflinger.
Servisc veteriner dl Prëner
La Provinzia tulerà su tratatives cun l Guviern a Roma per sëurantò l servisc statel di dutores dal bestiam sun la sëida de stat, sun Prëner. A Bulsan iel bele n servisc de chësta sort che pudëssa unì metù adum cun chël che fej te chësc mumënt 10 culaburadëures sun l Prëner.
Frabiché cuatieres
Do che la Provinzia ova nvià via l program per frabiché cuatieres per la populazion de davani mesan, che davania danter 39.000 y 50.000 Euro netto al ann, iel śën debujën de adaté i regulamënc. “L plu riesc che la va, cialons de regulamenté cuestions sciche l fit” à dit Drunwalder. Suvënz ne à i Chemuns mo nia udù dant la puscion per frabiché chisc cuatieres. Śën dëssel unì fat a na maniera che l possa unì frabicà plu riesc chësta sort de cuatieres tres na pruzedura scëmpla.
Spedel a Bulsan
La Provinzia à udù dant de frabiché pro al spedel de Bulsan per n custimënt de 430 milion de Euro. Per nia messei aspité che l Chemun de Bulsan anjenië la nfrastrutures primares, ulëssa la Jonta che la Provinzia fajessa chëstes nstëssa plu riesc y per n mënder custimënt. I lëures ie udui dant per 20,6 milion de Euro.
Assegurazion per i paures
Per cuntribuc da pert dla Region per la assegurazion de pension di paures iel unì dat pro criteries nueves. Chisc reverda i paures che à me na pitla cumpëida de bestiam y de puscion. La mudazion ie unida fata pra l lëur che i paures possa fé sëuraprò. “Nchin śën giapoven l cuntribut cun n davani sëuraprò nchin a 15.500 Euro” à dit Drunwalder. Chësta sëida ie unida auzeda a 20.000 Euro. Tl ann 2002 à 5715 paures giapà n cuntribut per paië ite la pension, tl ann 2008 ne n fovel mo 4.842.
as
