Atualità
Sies ladins danter i premiei per „Syndrome 09“
USP – La prima tlas “A” dla Scola auta per l soziel a Persenon y na grupa dla Val Venuesta à venciù la segonda pert dl cuncors online “Syndrome09”. Danter chëi che ncuei (24 merz) pudù pië do l pest dal assessëura Sabina Kasslatter Mur a Persenon, iel nce sies sculees ladines.
Sota l inuem “Sunshine” à 21 sculeies dla prima tlas dla Scola auta per l soziel a Persenon venciù la segonda pert dl juech online metù a jì per l ann de cumemorazion 2009. Dala mans dl’assessëura provinziela ala scola y cultura Sabina Kasslatter Mur à la tlas premieda pudù pië do n bon de 1.200 Euro per fé n viac tl Tirol storich. “L fej gran plajëi che da utober nchin śën à passa 3.000 jëuni fat pea l juech” à dit l’assessëura. “Chësc mostra che l juech plej ai jëuni”. La sies mutans ladines vën n gran pert dala Val Badia, chëstes ie Valentina Clara y Ilenia Verginer de Longiarù, Evi Schatzer da La Ila, Judith Delmonego y Ivana Pitscheider de Badia cun Pamela Brugnoli de Urtijëi.
L prim pest à nce giapà na grupa de diesc jëuni dala Val Venuesta che à fat pea l juech sota l inuem “SkiChallenge”.
Jëuni danter 11 y 19 ani de duta la grupes de rujeneda possa mo fé pea l juech online. “L juech ie fat a na maniera che nce cuncurënc nueves possa mo vëncer l pest prinzipel” spiega Josef Oberhofer, coordinadëur dl juech. Da vëncer iel sëuraprò a bons per viages, nce mini-laptops, bons per articuli per l sport, bons per furmazion, libri y dvd. Da nuef iel nce n blog (http://blog.syndrome09.net/) tres chël che i cuncurënc possa se giamië nfurmazions.
Do la terza pert dl juech (www.syndrome09.net) uniral ai 9 de mei tenì la premiazion generela y pona giaurirà nce la gran mostra dl Tirol “Labyrith::Lidëza” a Franzensfeste.
L juech Syndrome ne vën nia me pità per tudësch y talian ma nce per gherdëina y badiot. Cun stories y ntraunides de fantajia possa i cuncurënc mustré si savëi n cont dl Tirol, si storia, cultura, natura y ambient, ma nce lauré ora argumënc y a chësta maniera ngrandì si savëi.
as
