Atualità
La cumissera europea Hübner ie drët cuntënta cun i programs dl Südtirol
USP – Laudes da pert cumpetënta à ncuei (2 auril) giapà l’Aministrazion provinziela n cont de co che ie unic adurvei i scioldi dla Union Europea. “Son drët cuntënc di programs dla Provinzia de Bulsan ajache i dà pëis ai chëi ciamps che ie nce de mpurtanza per l’Europa: inuvazion, energia y ambient” nsci la cumissera europea Danuta Hübner do l’ancunteda cun l Presidënt Luis Drunwalder.
Sun nvit dl Presidënt dla Provinzia ie la cumissera europea Hübner tl Südtirol per se fé n cheder de co che vën adurvei i scioldi dl fond struturel europeich. “Chisc Fonds ie de gran mpurtanza per l svilup de n raion sciche l Südtirol” à sorissà Durnwalder. Nchin tl ann 2013 iel bele unì dat pro sustënies per l Südtirol te de plu categuries: 312 milion de Euro per l svilup regiunel, 160 milion da pert dl fond soziel, 75 milion per nfrastrutures de campania, 170 milion per culaburazions sëura i cunfins y 15 milion per l program leader. “Per l Südtirol fejel ora feter 100 milion al ann, ma sëuraprò al aspet economich, nes permët chisc scioldi de nvië via truep” à dit Drunwalder.
Hübner à laudà l Südtirol per avëi stlut ju i programs europeics nchin śën, fajan referimënt che a Brüssel iesen drët cuntënc cun i programs struturei nueves dla Provinzia de Bulsan. I ponc prinzipei reverda tlo ciamps de mpurtanza strategica sciche la inuvazion, la nrescida, l svilup, ma nce l’efizienza n cont de energia, l ambient y la defendura da periculi dla natura.
La vijita tl Südtirol ie nteressanta ajache Hübner uel studië l model de svilup tl Südtirol. “Tl’Europa iel truep raions che ti semea al Südtirol, ma che à da ciampì cun l fenomenn dla jënt che se n va” à dit la cumissera. Tl ejëmpl dl Südtirol possen analisé la strategies per jì contra chësc fenomenn. Ëila ti à dat tl uedl che tlo da nëus ie l svilup basà sun l duré tl tëmp y valivé ora cuestions ora dl balanz. “Tlo vëniel fat truep per purté inant la Provinzia tres tuedes y svilup, cialan sun l atratività per jëuni da na bona furmazion” à dit Hübner.
L ie nce unì rujenà di pruvedimënc dl Guviern provinziel per smëndrì la cunseguenzes dla crisa economica mundiela. “Al Presidënt dla Provinzia é segurà de sustenì la scumenciadives dl Südtirol contra la crisa” nsci la cumissera. Tla Union europea pënsen bele a scemplifiché cuestions burocratiches per la regions y de ti dé pertes di cuntribuc danora.
as
