Atualità
Zaites di sculeies per la scoles ladines
USP – Per la scoles ladines iel unì segurà la zaites di sculeies nce per l daunì. I sculeies dal’elementera ala scola auta possa se ncunferté sun de ndut cin zaites defrëntes.
“Mini Spatzenpost”, “Spatzenpost”, „Kleines Volk“, „Jö“ y “Topic” ie pitli cudejiei che vën bel da truep ani adurvei tl nseniamënt y che vën pitei ai sculeies sciche n mpuls sëuraprò a liejer.
“Chësc dëssa nce unì mantenì tl daunì” dij l’Assessëur ala Scola ladina Florian Mussner. “Ënghe per l proscimo ann scolastich 2009/10 unirà la spëises de chësta zaites di sculeies sëurantëutes dala Provinzia”
Su ncëria dl ÖJRK (Österreichisches Jugendrotkreuz) deberieda cun i editëures dl Jungösterreichischer Zeitschriftenverlag vën per i sculeies dla prima cater tlasses dla scola elementera uni mëns publichei i cudejiei “Mini Spatzenpost”, “ Spatzenpost” y “Kleines Volk”.
Per sculeies y studënc nchin al nono scialier scolastich vëniel, deberieda cun l Club dai libri di jëuni de Österreich mo pità doi zaites sëuraprò: “Jö” y “Topic”.
Chësta zaites vën suvënz ënghe adurvedes tl nseniamënt per via de si tematiches atueles y si valor educatif-pedagogich. Les god de gran cunsëns sibe tla scoles dl Österreich che te chëles de Südtirol.
Per jì ancontra ala esigënzes for plu autes de sculeies y studënc uniral, tl daunì tratà vel tematiches drët spezifiches te na njonta a pert.
Chësc ie nce merit dla bona culaburazion cun l editëur che ultimamënter à metù a desposizion na rica vela on-line per nsenianc, che dëssa vester da mpuls a adurvé for de plu i cudejiei tl nseniamënt.
“Per judé sculeies y studënc a auzé si nteres y cumpetënza tl ciamp dla letura ie la pitla revistes, che vën spartides ora debant, n mesun drët adatà ala esigënzes dl tëmp y mët la Provinzia tla cundizion de jì do a si mpëni politich-educatif” dij Mussner.
as
