Atualità
Ai 16 de lugio vëniel giaurì la zircunvalazion de S.Crestina
USP – N juebia che vën, 16 de lugio vëniel ufizialmënter giaurì la streda de zircunvalazion nueva a S.Crestina. Per l tai dla vëta unirà adalerch l presidënt dla Provinzia Luis Durnwalder y l assessëur ai lëures publics Florian Mussner.
La nueva streda de zircunvalazion mesura 1.600 metri, cun cater puenc y doi tuniei. L tunel “Monte Pana” ie 475 metri lonch y l tunel “Saslong” che passa sota l purtoi dai schi, ie de 375 metri. Do doi ani de lëures vëniel a S.Crestina festejà l mëter man de n’era nueva cun na miëur cualità de vita per l luech.
La giaurida ufiziela dla streda de zircunvalazion nueva unirà tenida
n juebia 16 de lugio
dala 5 domesdì
a S.Crestina tl raion Iman, pra l rundel danter i doi tuniei.
L tai dla vëta unirà fat dal presidënt dla Provinzia Luis Durnwalder, l assessëur ai lëures publics Florian Mussner y l ambolt de S.Crestina Bruno Senoner.
Dala 7 da sëira meterà man la festa sun la vedla streda cun spetaculi de jungladëures, artisć dl fuech y sun la croces, mujiga cun de plu grupes, animazions per i mëndri y arpizedes sun parëi. Dala 9 da sëira uniral fat na spetacul dl fuech cun l bal dla dives.
as
