Atualità
Giaurì l puent y doi sotpassajes a Corvara
USP – Cun na pitla zeremonia iel ncuei vënderdi (16 utober) unì ufizialmënter stlut ju i lëures per l puent nuef cun sotpassaje a Corvara. L puent nuef dla streda statela lieia Corvara ala frazion de Colfosch. “Chësc lëur ie n ejëmpl de bona culaburazion danter Provinzia y Chemun” à sorissà l assessëur provinziel Florian Mussner.
Di per di passa sun l puent sëura “La Gran Ega” passa 5.000 auti y mesuns pesoc. L vedl puent fova tan melciafià che l Assessorat provinziel ai lëures publics l à fat da nuef per respeté nscila nce la normes. Te chësta ucajion à l Chemun de Corvara fat n sotpassaje per passé sota l puent cun la roda (larghëza de 3,5 metri) y n tretuar. A Corvara iel unì desmustrà che tres na bona culaburazion danter Provinzia y Chemun arjonjen drët de bona soluzions, sparanian nce tl medemo mumënt.
Riesc do l inviern, de mei de chëst ann, fovel unì mplenì su l ruf a na maniera da pudëi passé provisoriamënter. L ie pona unì trat ju l vedl puent y de setëmber an scumencià a fé la sotpassaje y l tretuar. Chisc lëures ie te nianca do mënsc, unì fai te n tëmp plutosc curt zënza cumpurté problems al muvimënt sun streda. “L ie mpurtant che i lëures vënie udui y laurei ora te n cunzet generel, tenian cont no me dl muvimënt di auti ma nce la segurëza de chëi che va à pe y cun la roda.” à sorissà assessëur provinziel Florian Mussner.
L custimënt per fé da nuef l puent ie de ndut stat de 568.220 Euro. L sotpassaje y l tretuar fai dal chemun, ie unic finanziei tres la Provinzia.
L ambolt Francesco Pedratscher à ncuei vënderdi nce giaurì l sotpassaje che l Chemun de Corvara à fat tl raion dl puent “Da Bos”.
as
