Atualità
Televijion digitela n funzion te Gherdëina y tla Val Badia
USP – Ncuei, 9 de nuvëmber ie n di storich per la trasmiscion televisiva te Gherdëina y tla Val Badia. I lëures per destudé ju l signal analogh y fé jì la trasmiscion digitela ie jic bën. La populazion ladina possa de ncuei giapé na majera vela de programs dla televijion y leprò te na miëur cualità.
I tecnics dl’Azienda de Radiotelevijion RAS à ncuei, 9 de nuvëmber laurà pra na desëina de antënes. Bele ncuei domesdì via à i cin mplanc de Gherdëina y i set mplanc dla Val Badia me mplu mandà ora l signal digitel. Per la televijions a cësa uel chësc di na majera vela de programs y na miëur cualità per udëi y audì la televijion.
Deberieda cun i tecnics dla RAS fovel ncuei danter Pass Pinei, Dantercëpies, Piz La Ila y Mareo nce i esperc dla stazions televisives sciche la RAI per fé la mudazions pra l’antënes. Do ultima nfurmazions ie i lëures jic drët bën.
Cun la mudazion tla valedes ladines iel bele unì arjont l setimo, de ot raions tla Provinzia de Bulsan. Nchin a ncuei ie la dates, che n se ova metù dant deberieda cun l minister de Roma, unides respetedes de plën. L ultimo raion, chël dla Val d’Isarch unirà adatà n mierculdi.
De plu nfurmazions sun la mudazion dla trasmiscion televisiva o co che n chier da nuef i programs de televijion ie nce da giapé tl internet sota www.provinz.bz.it/digitaltv y sota www.ras.bz.it ulache l ie nce la nfurmazions tla rujeneda ladina. Aiuc tres nfurmazion possen mplu damandé cherdan su la RAS (0471 546666) o la RAI (0471 902444, 0471 902445).
as
