Atualità
22 utober, Di dla Cultura Ladina: funzion di media tla mendranzes
USP – “I media tol ite for na majera mpurtanza tla vita da uni di, per na grupa de mendranza à i media n valor y na funzion zentrela.” Ai 22 de utober, l Di dla Cultura Ladina, uniral jit plu sot te chësc argumënt de gran atualità cun l sustëni de esperc de inuem. Nteressei de duta la grupes de rujeneda ie nviei tl palaz Widmann a Bulsan.
L diretëur dla Radio y Televisiun Rumantscha Mariano Tschuor y l vizediretëur de RAI 3 Ennio Chiodi, doi esperc de inuem, dajerà pra l Di dla Cultura ladina mpulsc sun la gran tematica di media tla mendranzes. “La mpurtanza di media devënta for majera y si nflus ie deventà pert costanta te nosta cumenanza” spiega Alexander Prinoth, diretëur dla repartizion per la Cultura Ladina, respunsabl per l’urganisazion. Ai 22 de utober unirà chësta problematica plu lergia proieteda sun la situazion de mendranza.
Do i doi referac uniral tenì na descuscion cun l assessëur Florian Mussner, l diretëur dla RAI de Bulsan Carlo Corazzola, la redadëssa de Gana Ingrid Runggaldier y l diretëur de La Usc di Ladins Iaco Rigo.
“I media à nce na funzion mpurtanta tla cura dla rujeneda, perchël à la cualità dla rujeneda ti media n gran valor” sorissea l assessëur ladin Florian Mussner.
Zitadins de duta la grupes de rujeneda de nosta provinzia ie nviei al Di dla Cultura Ladina y se dé ju cun l argumënt “Mendranzes – Media – Lingac”. L program dl 22 de utober tl palaz Widmann a Bulsan scumëncia dala 9 danmesdì cun na ntroduzion dl presidënt dla provinzia Luis Durnwalder y l assessëur Florian Mussner.
as
