Atualità
Jonta provinziela uel amunì mpede straufé
USP – Amunizions mpede straufonghes: chësta ie la maniera cun chëla che la Jonta provinziela uel ti jì permez a chëi che ne à nia tenì ite la normatives aministratives. Chësc dëssa aldò de Durnwalder valëi sce l nia respeté ne à nce nia cumpurtà dann.
Amunì mpede straufé canche zachei ie jic sëura la normes aministratives ora, ie bele giut pruposta dla Jonta Proviniziela. Ajache la Chëurt di Conc à for inò metù si veto, sun la 50-60 normes provinzieles, à i assessëures (ncuei) ai 18 utober dat pro na regulamentazion plu generela che vëija dant n’amunizion sce l ne ie nia unì fat dann. “Ti fajeron al savëi ala persona tucheda che l se à fat na gauja y che l à n cër tëmp a desposizion per mëter a post la situazion, zënza straufonga” à spiegà Durnwalder.
A chësta maniera dëssel nce unì sparanià truep lëur aministratif. L’aministrazion ti va permez al zitadin zënza straufé, ma te na funzion de nfurmazion y educazion.
as
