Atualità
Jonta: Durnwalder conta dl’ancunteda cun l minister Frattini
USP – N sada 16 utober ie unì a se l dé a Maran l’ancunteda che l minister Frattini se ova bele da giut damandà cun l presidënt dla provinzia Durnwalder. “Mpede se strité tres i media dëssel unì rujenà”: chësc ie stat l pensier che à sburdlà a fé l’ancunteda ulache l ie unì rujenà de 20 cuestions daviertes. Durnwalder à nfurmà la Jonta provinziela sun i resultac dl’ancunteda.
“On pudù rujené a na maniera davierta y ogetiva sun cuestions tla relazion danter Roma y Bulsan che ie mo daviertes” nsci à Durnwalder cuntà dl’ancunteda cun minister Frattini. L dëssa unì metù a jì mo d’autra ancuntedes a plu livei, y sce l Guviern uel veramënter la culaburazion, possel bel riesc scumencé cun la normes de atuazion che la cumiscions di 6 y 12 à bele anjenià.
L’ancunteda istituzionela ie stata de utl per trëi majeri ciamps che reverda l ajurnamënt dl’autonomia: la normes da atuazion che ie sun mëisa dla cumiscions paritetiches, chëles che ie mo da traté tla cumiscions di 6 y 12, y la atualisazion de d’autra normes stateles.
La normes de atuazion bele anjeniedes reverda la garanzia che i culaburadëures dla Polizia sebe la doi rujenedes provinzieles, i ejams de rujeneda per stieres publiches tla suneries (almanco una prova tla rujeneda detlareda sciche rujeneda dl’oma, per astilé ora detlarazions sfauzedes), stlarimënc de cumpetënza cun la Cëurt di Conc n cont de regulamënc y finanziamënc dl’Università, chemuns y istituzions provinzieles. Argumënt bele anjenià tres pruposta de norma de atuazion ie nce la sëurandata de stredes y puscions da pert dl’ANAS, cumpetënzes dl ENAC Y ENAV per l aeroport de Bulsan, la delega di archivies de Stat a Bulsan.
Danter la normes de atuazion che muessa mo unì tratedes dala cumiscions paritetiches ie unì rujenà dla cumpetënza per l parch naturel dl Stelvio da sëurandé ala regions Lombardia y Trentino-Südtirol che se sëurantulëssa nce dl finanziamënt. Frattini y Durnwalder à pona nce rujenà se sëurandé la cumpetënza aministrativa dla RAI de Bulsan, l tò ite y spartizion dla posta. Durnwalder à purtà la pruposta de trëi mpede doi cunselieres de Stat de rujeneda tudëscia, n cuncors per n cuntinghënt de doi rujenedes tla Polizia (nteressei de rujeneda tudëscia, ladina y taliana che sà la doi o trëi rujenedes, ne adurvëssa a chësta maniera nia da fé trëi ani de militer dan fé dumanda pra la Polizia).
N cont dla mudazions de normes stateles à l minister y l presidënt dla provinzia rujenà dla ratificazion dl protocol di trasporc dla Cunvenzion dl’Elpes y de n sustëni dl Stat ala families dla vitimes dla tragedia dla ferata dla Val Venuesta. Argumënt ie nce stat l miuramënt la ferata sun l Prëner y l tunel de basa che taca adum cun la cunzescion dl’autostreda. Frattini à mustrà despunibltà de ressolver la custion aldò dla pruposta dla Provinzia, slungian la cunzescion se fajan valëi a Bruxelles. L problem muessa nce unì stlarì a Roma, à dit Durnwalder, ajache l minister ala finanzes adurvëssa i scioldi dla cunzescion, y l minister dla nfrastrutures ulëssa l finanziamënt dl tunel dl Prëner tres l’autostreda. Sce l fossa n gran cunzern a giapé la cunzescion dl’autostreda dl Prëner, se tëmen che l unissa fat manco nvestimënc, auzà l daz y tëut demez l finanziamënt per l tunel dla ferata. Frattini à segurà si mpëni per l tunel dl Prëner tenian cuntac cun l’Austria y la sëntes nternaziuneles.
as
