Atualità

Frabiché | 19.10.2010 | 17:17

Culaburazion sëura la sëides per nuzé ressorses natureles

USP – Na culaburazion sëura la sëides ie la mira de n proiet INTERREG IV danter la Talia y l’Austria. Pra la prejentazion dl proiet, ncuei 19 utober a Bulsan à l assessëur Florian Mussner sorissà la mpurtanza de nuzé la ressorses natureles da tlo y ma de les adurvé cun cura.

Cun la culaburazion danter la regions uelen purté inant n svilup sustenibl mantenian la posizion sun l marcià dla set regions sun la sëida danter la Talia y l’Austria. Per chësc proiet iel a desposizion 693.000 euro.

„Ulon a chësta maniera mustré su nosc sasc, na ressorsa mpurtanta per l Südtirol“ à dit l assessëur Mussner. I sasc naturei ne vën tlo da nëus nia me adurvei per decurazion ma nce tra frabiches autes y per la stredes. „Nchinamò ie truep sasc unic menei da dalonc caprò, perchël iel drët se fé pensieres sun l bilanz ecologich de chisc imporc. Leprò vën mo la cundizions cun chëles che l vën giavà ora i sasc te paejes dalonc.“ à dit l assessëur ai lëures publics. L nvit da pert de Mussner ie de se nuzé de plu dla ressorses de cësa, ma cun cura, ajache nce chësta ressorses ne ie nia zënza fin. Tl daunì dëssel unì laurà de plu cun material rezitlà, cossa che n possa nce fé a giavé ora tuniei sciche l ie stat l cajo pra l tunel a Auer.

Tl cheder dl proiet dëssel ntan i proscimi trëi ani unì tlupà adum savëi n cont di sasc te nosta regions, tenian cont de aspec economics, defendura dla natura y cumpatibltà soziela. L Ufize provinziel per geologia y cuntrol di materiai da frabiché fej pea l proiet y lëura deberieda cun l ciamp dla tecnologia di materiai dl’Università de Dispruch. Partner dl proiet ie nce l Ufize provinziel per ndustria, i Istitut per sustëni dl’economia dla Camera de Cumerz de Bulsan y la sozietà dl Tunel dl Prëner BBT SE. La pert dl Tirol dl Nord reverda la repartizion per urbanistica y statistica, lëures publics y geologia dl guviern dl Tirol, deberieda cun esperc dla ndustria dl sas y ceramica dla Camera dl Cumerz dl Tirol.