Atualità
Durnwalder à sëurandat l zënter per la sanità a L’Aquila
USP – “La solidarietà ne cunësc nia rujenedes o raion, l ne ie nia me duvier dla man publica, ma la se damanda nce l mpëni di privac, sciche à fat la fundazion Rubner”: cun chësc pensier à l presidënt dla Provinzia Durnwalder ncuei (21 utober) sëurandat l zënter per la sanità a L’Aquila. L presidënt dla Provinzia à cunedì che l unirà mo finanzià n frabicat tl Chemun de Ocre: na nueva cësa dla cultura.
L mpëni dla Provinzia de Bulsan per fé su da nuef i raions dl Abruzzo tuchei de auril 2009 dal tremot, de se fërma nia. La strutura che ie unida sëurandata da Durnwalder ie unida frabicheda do l model “Blockhaus” tres la fundazion Rubner, che l ova data ala Prutezion zevila dla Provinzia de Bulsan. La Provinzia l à pona data al’azienda sanitera che se nuzea dla cësa per uniteies de diabetologia y malaties metaboliches, cun nce l ambulatuere per l’anestesia y rianimazion.
“Ti mumënc de bujën vala de mustré de vester daujin y de dé n sustëni cuncret – à dit Durnwalder ntan la sëurandata – y la Provinzia de Bulsan fej si pert. Dlogia l’aministrazion publica dëssa nce i privac judé pea, sciche l à fat la grupa Rubner tl Abruzzo. Tl tëmp do l tremot à la grupa Rubner fat 75 cëses per cuatieres y 220 cuatieres provisories, aldò de Durnwalder na “cherta da vijita per l Sudtirol”.
Tl raion desdrù dal tremot à la repartizions provinzieles y ulenteres dl Sudtirol laurà 6.981 dis per persona cun de ndut 89.453 ëura de lëur. Ëi à dat ora feter 53.000 cëifs cun sustëni psicologich y assistënza de prim aiut. Tla frazion de Ocre à la Provinzia de Bulsan fat su 20 cëses dla categuria Cësa Tlima B, cun plazes dai auti, nfrastrutures primeres y 11 plataformes per cëses cumbinedes. L ie unì spendù ite passa 3 milion de euro. Dunwalder manda inant ai ulenteres, tecnics provinziei y zitadins dla provinzia de Bulsan l gran de gra da pert dla populazion abruzesa. “L lecort ala jënt dl Südtirol ie mo ti cueres dla jënt dl Abruzzo” fej al savëi Durnwalder.
Dla dunfiertes di chemuns y di zitadins dla provinzia de Bulsan iel mo a desposizion feter 350.000 euro che possa unì adurvei per na cësa dla cultura a Ocre, fajan su na luegia de ancunteda soziela.
as
