Atualità
Di dla Cultura Ladina: descuscion de culaburazion
USP – Pra la mëisa de descuscion dl Di dla Cultura Ladina (comunicat a pert) iel ncuei, 22 utober, unì nunzià de plu ponc per svilupé i media de rujeneda ladina. L à rujenà l assessëur Florian Mussner, l diretëur dla RAI de Bulsan Carlo Corazzola, la redadëssa de Gana Ingrid Runggaldier y l diretëur de La Usc di Ladins Iaco Rigo, cun la muderazion de Diego Clara.
Argumënt che à giapà na bela lerch ie stat ampliamënt dla RAI Ladina per plu ëures de trasmiscion y plu autonomia. “Lauron politicamënter per n finanziamënt dla RAI de Bulsan, ma i truep ani che l vën laurà de chësc viers desmostra tan rie che l ie” à dit l assessëur Mussner. Per l mpëni di aministradëures provinziei y dla persones de referimënt mancel mo n pue’ l sustëni dal lajù su, dala basa. Mpede 40 ëures de programazion ladina al ann vëniel mustrà 50 ëura, y chësc ajache l ie la bona ulentà di respunsabli dla RAI y l finanziamënt extern. La RAI nstëssa ie stenteda a ngrandì la RAI ladina ajache ti mancia la pusciblteies finanzieres.
Ala dumanda do plu nutizies da dut l mont tla rujeneda ladina iel unì ora la dificultà struturela per via di puec culaburadëures a tëmp plën. Ti cialan al daunì iel pona da plu pertes unì sorissa l bujën de pité cuntenuc dedichei a jëuni y mutons, l publich dl daunì.
N cont de culaburazion danter mendranzes iel nce unì dit che n proiet INTERREG danter ladins y Grijons fova bele unì nvià via per la zaites ma pona ne fovel nia plu unì purtà a realisazion. Ma la rezeta per n svilup di media, semea vester aldò dla descuscion, la culaburazion. Da pert provinziela ie unì fat n var pitan l servisc de ufize stampa nce tla rujeneda ladina. “La identità ladina vën cureda tres la relazions danter la persones, nsci dëssel nce unì abinà na culaburazion danter redazions” à dit Florian Mussner. Carlo Corazzola, diretëur dla RAI de Bulsan, se stënta a se nmaginè che l aparat dla RAI naziunela lascià pro chësta streda. Per la revista Gana, nsci Ingrid Runggaldier, ie l ubietif plucheauter de resté na plataforma, ntant che Iaco Rigo, diretëur de La Usc à detlarà de vester cuntënt de pudëi baraté articuli cun i jurmani dla zaita La Quotidiana ti Grijons.
as
