Atualità
Jonta provinziela: degun spustamënc per frabiché l tunel dl Prëner
USP -La Jonta provinziela à ncuei (25 utober) giapà l’ultima nfurmazions da pert dl’Austria per via de frabiché l tunel de basa dl Prëner. I lëures ne vën nia spustei. A scumenciamënt dl 2011 ie udù dant de scrì ora i lëures y ntan l ann iel prugramà de scumencé a giavé ora l tunel danter Franzensfeste y Dispruch. Tl medemo tëmp dëssa nce unì fai i lëures danter Pruca y Franzensfeste per ruvé permez al tunel.
Do la dezijons de priorità dl guviern dl’Austria per la nfrastrutures, fovel ntan l fin dl’ena unì ora plu nutizies contraditories. L presidënt Durnwalder à da duman riesc damandà do nfurmazions a Dispruch pra l presidënt ujin Günther Platter y l aministradëur dla sozietà per l tunel dl Prëner Konrad Bergmeister deberida cun l Vizekanzler Josef Pröll. “La Jonta provinziela de Bulsan à giapà cunferma dal’Austria che i lëures ne vën nia fermei” à dit Durnwalder.
L program per frabiché l tunel dl Prëner vëija dant: de jì inant cun l tunel de esplurazion, a scumenciamënt dl 2011 de scrì ora i lëures per l tunel prinzipel y scumencé chisc lëures ntan l ann. Tl medemo tëmp dëssel nce unì scumencià cun la scines da ruvé permez, danter Pruca y Franzensfeste.
Nchin dl 2015 fejen cont de giavé da doi pertes: da Dispruch de viers de Ahrental y da Franzensfeste de vies de Trens. Dal 2016 dëssel unì scumencià a giavé da amez, al autëza de Mauls te doi direzions. La programazion vëija dant de finé i lëures ti ani 2022-23 y de pudëi jì n funzion tl ann 2025.
Nchin tl ann 2015 puderan, aldò dla comunicazion ala Jonta, fé cont cun finanziamënt de feter 2,2 miliardes de euro: 800 milions dala Union Europea y l’autra pert unirà spartida danter la Talia y l’Austria. Cun data da ncuei (25 utober) ie nce unì fat a savëi la relazion danterite dla Cumiscion europea di proiec TEN. L ie unì segurà i finanziamënc dl tunel dl Prëner per i ani 2007-2013, che l tëmp per la realisazion ie madur y che l possa unì scumencià a giavé.
as
